Xalq deputatlari Shovot tumani Kengashi kotibiyati mudiri, 24-Gulshan saylov okrugi deputati Masharipov Izzat Masharipovich tomonidan Turkiston mahallasi hududida faoliyat yuritayotgan tadbirkorlik subyektlari bilan uchrashuv o‘tkazilib, ularning faoliyati davomida uchrayotgan muammolar joyiga chiqqan holda o‘rganildi.
Muloqot davomida tadbirkorlar tomonidan asosan maishiy chiqindilarni o‘z vaqtida olib chiqib ketish bilan bog‘liq masalalar ko‘tarildi. Mazkur murojaatlar yuzasidan tadbirkorlarga amaldagi tartib va qonunchilik talablari bo‘yicha batafsil tushuntirishlar berildi.
Xususan, O‘zbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qo‘shimcha chora-tadbirlar to‘g‘risida”gi PQ–387-son qaroriga muvofiq, joriy yildan boshlab Shovot tumanida maishiy chiqindilar, agrotexnik ishlov berish jarayonida hosil bo‘ladigan chiqindilar (daraxt va buta shox-shabbalari, barglar) hamda ko‘chalarni tozalashdan hosil bo‘ladigan chiqindilarni to‘plash va olib chiqib ketish xizmatlarini tashkil etish vazifasi Shovot tumani Obodonlashtirish boshqarmasi zimmasiga yuklatilgani ta'kidlandi.
Shu munosabat bilan tadbirkorlarga Obodonlashtirish boshqarmasi bilan belgilangan tartibda shartnoma tuzish hamda chiqindilarni o‘z vaqtida olib chiqib ketish xizmatidan foydalanish zarurligi tushuntirildi.
🤝 Tadbirkorlik faoliyatini qo‘llab-quvvatlash, ularning muammolarini joyida o‘rganish va amaliy yechimlar ishlab chiqishga qaratilgan uchrashuvlar izchil davom ettiriladi.