Xalq deputatlari Sardoba tumani Kengashi deputati G.Suvonqulovaning tashabbusi bilan Sardoba tumanidagi “Birlashgan” mahallasida faoliyat yuritayotgan “Humo” o‘quv markazida ijtimoiy reyestrga kiritilgan xotin-qizlar va ishsiz ayollarni kasb-hunarga o‘qitish maqsadida Bandlikka ko‘maklashish markazi bilan hamkorlikda o‘quv vaucherlari ajratilmoqda.

Mazkur tashabbus doirasida xotin-qizlarga zamonaviy va talab yuqori bo‘lgan kasblarni egallash, yangi bilim va ko‘nikmalarga ega bo‘lish hamda kelgusida o‘zini o‘zi band qilish yoki munosib ish o‘rinlariga joylashish uchun zarur imkoniyatlar yaratiladi.

O‘quv jarayonlari dushanba kunidan boshlanib, ishtirokchilarni kasbiy tayyorlash va amaliy ko‘nikmalarini shakllantirishga qaratilgan holda tashkil etiladi.

Bunday amaliy ishlar, avvalo, xotin-qizlarning ijtimoiy-iqtisodiy faolligini oshirish, ularning bandligini ta’minlash va oila farovonligini mustahkamlashga xizmat qiladi