“Yangi hayot” mahallasida yoshlar o‘rtasida huquqbuzarliklarning oldini olishga qaratilgan muhokama yig‘ilishi bo‘lib o‘tdi

Jamiyat barqarorligi va taraqqiyoti, avvalo, undagi tinchlik va xavfsizlik darajasi bilan belgilanadi. Ayniqsa, mahalla darajasida jinoyatchilikning oldini olish, yoshlarni turli huquqbuzarliklardan asrash bugungi kunning eng dolzarb vazifalaridan biri hisoblanadi. Shu maqsadda joylarda olib borilayotgan tizimli ishlar, hamkorlik va jamoatchilik nazorati muhim ahamiyat kasb etmoqda.

Namangan shahrining “Yangi hayot” mahallasida jinoyatchilikning oldini olish hamda huquqbuzarliklarni muhokama qilishga bag‘ishlangan yig‘ilish bo‘lib o‘tdi. Unda Namangan shahar hokimi, Xalq deputatlari Namangan shahar Kengashi deputati, viloyat Ichki ishlar boshqarmasi boshlig‘ining birinchi o‘rinbosari hamda shahar prokurori ishtirok etdi.

Yig‘ilish davomida hududda mas’ul tashkilotlar tomonidan amalga oshirilayotgan profilaktik chora-tadbirlar, ayniqsa, yoshlar o‘rtasida huquqbuzarliklarning oldini olish borasidagi ishlar yuzasidan hisobotlar tinglandi. Mutasaddilar tomonidan mavjud muammolar tahlil qilinib, ularning ildiz sabablari chuqur muhokama etildi.

Shuningdek, mahallani jinoyatchilikdan holi hududga aylantirish yo‘lida amalga oshirilishi lozim bo‘lgan ustuvor vazifalar yuzasidan o‘zaro fikr almashildi. Bu borada profilaktika inspektorlari, ta’lim muassasalari, mahalla faollari hamda ota-onalar hamkorligini kuchaytirish zarurligi alohida qayd etildi.

Yig‘ilishda mahalla tizimi va jamoatchilik nazoratining o‘rni beqiyos ekani ta’kidlanib, fuqarolarning befarq bo‘lmasligi, o‘z hududidagi ijtimoiy muhitga mas’uliyat bilan yondashishi jinoyatchilikni kamaytirishda hal qiluvchi omil ekani qayd etildi.

Mazkur uchrashuv mahallada tinch va osoyishta hayotni ta’minlash, fuqarolar xavfsizligini mustahkamlash yo‘lida muhim qadamlardan biri bo‘lib xizmat qilishi shubhasiz.