Deputat so‘rovida Xalq deputatlari Bag‘dod tumani Kengashi deputatlarining saylovchilar bilan uchrashuvlari hamda hududlarda mavjud muammolarni o‘rganish yuzasidan tasdiqlangan reja-jadvalga muvofiq, “O‘zbekiston” mahalla fuqarolar yig‘ini hududida o‘rganish ishlari olib borilgani qayd etildi.

✅ O‘rganish davomida “Yoshlik” va “Baxt” ko‘chalarida yashovchi fuqarolarning Bag‘dod–Qo‘qon yo‘nalishidagi avtomobil yo‘lidan xavfsiz harakatlanishi bilan bog‘liq muammo mavjudligi aniqlandi.

✅ Xususan, mazkur avtomobil yo‘lining boshlanish qismida birinchi va ikkinchi piyodalar o‘tish joylari oralig‘idagi masofaning uzoqligi sababli fuqarolar, jumladan, piyodalar yo‘lni belgilanmagan joylardan kesib o‘tishga majbur bo‘layotgani qayd etildi. Mazkur holat piyodalar harakati xavfsizligiga salbiy ta’sir ko‘rsatib, yo‘l-transport hodisalarining oldini olish bo‘yicha qo‘shimcha choralar ko‘rishni taqozo etmoqda.

✅ Shu munosabat bilan, hududda piyodalar harakati xavfsizligini ta’minlash maqsadida qo‘shimcha piyodalar o‘tish joyini tashkil etish hamda mavjud piyodalar o‘tish joylarining yo‘l chiziqlarini qayta chizish zarurati mavjudligi bildirildi.

✅ Yuqoridagilarni inobatga olib, O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunining 8-moddasiga muvofiq, deputat so‘rovida “O‘zbekiston” MFY hududidagi “Yoshlik” va “Baxt” ko‘chalari aholisi uchun Bag‘dod–Qo‘qon yo‘nalishidagi avtomobil yo‘lining boshlanish qismida, birinchi va ikkinchi piyodalar o‘tish joylari oralig‘ida qo‘shimcha piyodalar o‘tish joyini tashkil etish hamda mavjud piyodalar o‘tish joylarining yo‘l chiziqlarini qayta chizish bo‘yicha tegishli choralar ko‘rish so‘raldi.