34-sonli maktabgacha ta’lim muassasasida o‘rganish ishlari olib borildi

Xalq deputatlari Navoiy shahar Kengashi deputati Abdug‘aniyev Abror hamda Kengash kotibiyati bosh mutaxassisi Diyorbek Toyirov tomonidan Navoiy shahridagi 34-sonli maktabgacha ta’lim muassasasida o‘rganish ishlari olib borildi.

O‘rganish davomida muassasada yaratilgan shart-sharoitlar, tarbiyalanuvchilar uchun tashkil etilgan ta’lim-tarbiya jarayoni, binoning texnik holati hamda sanitariya-gigiyena talablariga rioya etilishi holati ko‘zdan kechirildi.

Shuningdek, guruh xonalari, oshxona, yotoqxona, tibbiyot xonasi va muassasa hududining obodonlashtirilish darajasi o‘rganilib, bolalar xavfsizligini ta’minlash, ta’lim sifatini yanada oshirish hamda mavjud infratuzilmani takomillashtirish masalalariga alohida e’tibor qaratildi.
O‘rganish jarayonida aniqlangan ayrim kamchiliklarni bartaraf etish, muassasadagi mavjud sharoitlarni yanada yaxshilash va tarbiyalanuvchilar uchun qulay hamda xavfsiz muhit yaratish yuzasidan mas’ullarga tegishli tavsiyalar berildi.

Ta’kidlanganidek, maktabgacha ta’lim tizimida olib borilayotgan islohotlarning samaradorligini oshirish, bolalarning har tomonlama barkamol rivojlanishi uchun munosib shart-sharoitlar yaratish hamda ta’lim muassasalaridagi mavjud muammolarni o‘z vaqtida hal etish ustuvor vazifalardan biri hisoblanadi.

Mazkur o‘rganish ishlari maktabgacha ta’lim muassasalarida ta’lim sifati va xizmat ko‘rsatish darajasini yanada oshirish, shuningdek, bolalar uchun zamonaviy va xavfsiz muhit yaratishga xizmat qiladi.