«Bozataw» awıl puqaralar
jıyını 3-sanlı «Shaǵırlı» saylaw okruginde máhálle infrastrukturasın jaqsılaw,
xalıq ushın qolaylı sharayatlar jaratıw, ásirese, jas áwladtıń mazmunlı dem
alıwın támiyinlew baǵdarında bir qatar áhmiyetli jumıslar ámelge asırıldı. 

Aytıp ótiw kerek,
máhállelerdegi ishki jollardı jaqsılaw, kóshelerdi túngi waqıtta jaqtılandırıw
hám xalıq ushın qolaylı jámiyetlik ortalıq jaratıw búgingi kúnde áhmiyetli
wazıypalardıń biri bolıp esaplanadı. 

Usı baǵdarda «Bozataw» awıl puqaralar jıyını aymaǵında 1,73 kilometr
ishki jolǵa qara qaplamalı asfalt tóselip, xalıqtıń erkin hám qáwipsiz
háreketleniwi ushın qolaylı sharayat jaratıldı. Bul bolsa máhálle
turǵınlarınıń kúndelikli turmısındaǵı qolaylıqlardı arttırıwǵa, jol
infrastrukturasın jaqsılawǵa xızmet etedi. 

Sonday-aq, «Bozataw» awıl puqaralar jıyını ishki kóshelerine 55 dana zamanagóy, energiya únemlewshi túnǵi
jaqtılandırıw shıraqları ornatıldı. Bunnan tısqarı, «Shaǵırlı» awılı
aymaǵındaǵı «Moynaq–Qońırat» avtomobil jolı boyı da túnǵi jaqtılandırıw
shıraqları menen támiyinlendi. Bul jumıslar keshki hám túnǵi waqıtta
kóshelerdiń jaqtı bolıwına, háreket qáwipsizligin arttırıwǵa hám turǵınlar
ushın qolaylı ortalıq qáliplestiriwge múmkinshilik beredi. 

Jas áwladtıń salamat ósip-rawajlanıwı, bos waqtın mazmunlı ótkeriwi hám
sport penen shuǵıllanıwı ushın da ayrıqsha itibar qaratıldı. Máhelle aymaǵında
balalar maydanshası qurılıp, ol zárúr oyın úskeneleri menen támiyinlendi.
Nátiyjede, balalardıń dosları menen birge oynawı, dem alıwı hám bos waqtın
paydalı ótkeriwi ushın qolaylı sharayat jaratıldı. 

Sonday-aq, jaslardıń sportqa bolǵan qızıǵıwshılıǵın arttırıw, salamat turmıs
tárizin keńnen en jaydırıw maqsetinde máhállede vorkaut maydanshası da
shólkemlestirildi. Bul jaslardıń fizikalıq belsendiligin arttırıwǵa, sport
penen turaqlı shuǵıllanıwına hám salamat ádetlerdi qáliplestiriwine xızmet
etedi. 

Ámelge asırılǵan bul jumıslar — deputatlıq baslamalarınıń máhálle
turmısındaǵı ámeliy sáwleleniwi, xalıqtıń turmıs sapasın jaqsılawǵa qaratılǵan
izbe-iz háreketlerdiń nátiyjesi. 

Eń baslısı, deputatlıq iskerliktiń nátiyjesi xalıqtıń turmısındaǵı
unamlı ózgerisler, jaratılǵan qolaylıqlar hám máhálle turǵınlarınıń razılıǵı
menen belgilenedi. Bunday baslamalar keleshekte de dawam ettirilip,
máhállelerdi kórkeytiw, xalıqtıń múrájatların úyreniw hám olardıń sheshimine
járdem beriw baǵdarındaǵı jumıslar izbe-iz alıp barıladı. 

Xalıq deputatları Moynaq rayonlıq Keńesiniń  

3-sanlı «Shaǵırlı» saylaw okrugi deputatı K.Nasırova