Xalq deputatlari Parkent tumani Kengashiga 15-“Beshkappa” saylov okrugidan saylangan deputat, tuman Kengashi kotibiyati mudiri Berdiqulova Mavluda Tojiddinovna hamda tuman Kengashi deputati, “Korrupsiyaga qarshi kurashish va xavfsizlik masalalari bo‘yicha doimiy komissiya” raisi Salimboyev Xasan Dilmurodovich deputatlik faoliyati doirasida o‘zlariga biriktirilgan Parkent tumani Favqulodda vaziyatlar bo‘limida bo‘lib, bo‘lim boshlig‘i Farxod Tursunqulov bilan uchrashdi.Uchrashuv davomida Kengash deputatlari hamda Favqulodda vaziyatlar bo‘limi o‘rtasidagi hamkorlikni yanada mustahkamlash,qonunlar ijrosini samarali ta’minlash, yong‘in va favqulodda vaziyatlarning oldini olishga qaratilgan profilaktik tadbirlarni kuchaytirish, aholi o‘rtasida targ‘ibot-tashviqot ishlarini tizimli tashkil etish hamda joylardagi ijtimoiy muammolarni mas’ul idoralar bilan hamkorlikda bartaraf etish masalalari muhokama qilindi.Shuningdek, uchrashuvda O‘zbekiston Respublikasining “Yong‘in xavfsizligi to‘g‘risida”gi Qonuni ijrosi yuzasidan amalga oshirilayotgan ishlar tahlil qilinib, qonun talablarining amaliyotdagi ijrosi, yong‘in xavfsizligini ta’minlash bo‘yicha ko‘rilayotgan chora-tadbirlar, tashkilot va muassasalarda xavfsizlik qoidalariga rioya etilishi hamda bu boradagi mavjud muammolar va ularning yechimlari yuzasidan fikr almashildi.Muloqot yakunida tumanda favqulodda vaziyatlarning oldini olish, yong‘in xavfsizligini ta’minlash, aholining bu boradagi huquqiy madaniyatini yuksaltirish hamda qonunchilik hujjatlari ijrosini samarali tashkil etishda Kengash deputatlari va Favqulodda vaziyatlar bo‘limi o‘rtasidagi hamkorlikni yanada kuchaytirish muhim ahamiyat kasb etishi ta’kidlandi.