Xalq manfaatlari yo‘lidagi izchil ishlarning mantiqiy davomi sifatida Xalq deputatlari
Ohangaron tuman Kengashi deputati Nilufar Abdiqulova tuman Kengashi kotibiyati mutasaddilari
bilan birgalikda “Ungut” mahalla fuqarolar yig‘inida o‘rganish ishlarini amalga
oshirdi.

Tashrifdan ko‘zlangan asosiy maqsad — mahallada aholi, ayniqsa yoshlar va bolalar uchun yaratilgan
sport infratuzilmasi holatini o‘rganish, mavjud imkoniyatlar va muammolarni aniqlashdan
iborat bo‘ldi. Bu borada hududdagi sport inshootlari, umumta’lim maktablari, kollej
va akademik litseylardagi sport zallari hamda ularning jihozlanish darajasi atroflicha
tahlil qilindi.

Dastlab, deputat va mutasaddilar 11-umumiy o‘rta ta’lim maktabida bo‘lib, ta’lim muassasasining
sport zali holati bilan tanishishdi. Zalning jihozlanishi, sport anjomlarining
yetarliligi, ularning texnik holati sinchiklab ko‘zdan kechirildi. O‘rganishlar
davomida ayrim jihozlarni yangilash va sport infratuzilmasini yanada takomillashtirish
zarurligi qayd etildi.

Shundan so‘ng, mahallada istiqomat qiluvchi aholi va yoshlar vakillari bilan ochiq muloqot
tashkil etildi. Samimiy ruhda o‘tgan uchrashuvda yoshlar o‘zlarini qiziqtirayotgan
masalalar, ayniqsa sport bilan shug‘ullanish uchun sharoitlarni yaxshilash bo‘yicha
taklif va mulohazalarini bildirishdi. Xususan, ular mahallada zamonaviy talablarga
javob beradigan stadion qurish zarurligini alohida ta’kidlashdi.

Deputat Nilufar Abdiqulova yoshlarning ushbu murojaatini diqqat bilan tinglab, uning ijobiy
yechimini ta’minlash maqsadida tegishli tashkilotlar bilan hamkorlikda amaliy chora-tadbirlar
ko‘rish zarurligini bildirdi. Shuningdek, mazkur masala yuzasidan tegishli idoralar
bilan muhokamalar olib borish rejalashtirildi.

Mazkur o‘rganish va muloqotlar aholi, ayniqsa yoshlar uchun munosib shart-sharoitlar yaratish,
ularni sog‘lom turmush tarziga jalb etish va sport infratuzilmasini yanada rivojlantirish
yo‘lida muhim ahamiyat kasb etishi tayin.

Slide 1 of 4