Navoiy shahrida maktab sport zali faoliyati ko‘zdan kechirildi

Navoiy shahrida ta’lim muassasalarida o‘quvchilar uchun yaratilgan sharoitlarni o‘rganish va ularni yanada takomillashtirishga qaratilgan ishlar izchil davom etmoqda. Shu maqsadda Xalq deputatlari Navoiy shahar Kengashi deputati Qo‘ziyev Ravshan Rayimovich hamda shahar Kengashi kotibiyati mudiri Xafizov Jo‘rabek O‘ktam o‘g‘li 3-sonli umumta’lim maktabiga tashrif buyurdilar.

Tashrif davomida maktabdagi sport zal faoliyati atroflicha ko‘zdan kechirildi. O‘quvchilarning jismoniy tarbiya mashg‘ulotlarida ishtiroki, ular uchun yaratilgan sharoitlar va mashg‘ulotlarni tashkil etish jarayoni bilan yaqindan tanishildi. Shuningdek, o‘qituvchilar va mas’ul xodimlar bilan muloqot o‘tkazilib, mavjud holat yuzasidan fikr-mulohazalar almashildi.

Suhbatlar davomida yoshlarning bo‘sh vaqtlarini mazmunli tashkil etish, ularni sportga keng jalb qilish hamda sog‘lom turmush tarzini shakllantirish masalalariga alohida e’tibor qaratildi. O‘quvchilarning jismoniy faolligini oshirish, ularda iroda va jamoaviylik fazilatlarini rivojlantirish muhim ekani ta’kidlandi.

Tashrif yakunida mas’ullar tomonidan bildirilgan fikr va takliflar kelgusida amalga oshiriladigan ishlar samaradorligini oshirishga xizmat qilishi qayd etildi. Bu kabi amaliy o‘rganishlar ta’lim muassasalarida tarbiya va ta’lim sifatini yuksaltirishda muhim ahamiyat kasb etadi.