Bozataw rayonı “Aspantay” awıl puqaralar jıyını aymaǵındaǵı “Porıltaw” elatıdaǵı 12-sanlı ulıwma bilim beriw mektep hám “Bozataw” posyolkası puqaralar jıyınındaǵı 1-sanlı ulıwma bilim beriw mektep imaratında, Qaraqalpaqstan Respublikası Joqarǵı Keńesi 56-“Bozataw” saylaw okrugi deputatı Tursınbay Abdijabbarovtıń saylawshıları menen ushırasıwı bolıp ótti. 

Ushırasıwǵa Xalıq deputatları Bozataw rayonlıq Keńesiniń deputatları Sharbay Berdaxov, Kenjegaliy Bisenov xámde rayonlıq Keńesi sekretariat baslıǵı Aziz Ibragimov, rayonlıq mákemeler, siyasiy partiyalar, ǵalaba xabar qurallarınan wákiller hám aymaqta jasawshı puqaralar qatnastı. 

Aymaqtıń nuranıyları hám keń jámiyetshilik wákilleri belsene qatnasqan ushırasıw ashıqtan-ashıq sóylesiw hám qızǵın pikirlesiw ruwxında ótti. 

Onda deputatlar shıǵıp sóylep, mámleketimizde, sonıń ishinde, Qaraqalpaqstan Respublikasında ámelge asırılıp atırǵan keń kólemli reformalar haqqında hár tárepleme maǵlıwmatlar berdi. Atap aytqanda, Ózbekstan Respublikası Prezidenti Shavkat Mirziyoevtiń basshılıǵında aymaqlardı sociallıq-эkonomikalıq jaqtan rawajlandırıw, xalıqtıń turmıs dárejesin arttırıw, infrastrukturanı jaqsılaw hám kóp milletli xalqımızdıń abadan turmısın támiyinlew baǵdarında alıp barılıp atırǵan mámleketlik siyasattıń áhmiyetin ayrıqsha atap ótti. Sonday-aq, Prezidentimiz tárepinen qabıl etilip atırǵan párman hám qararları xalqımızdıń turmısındaǵı tutqan ornı haqqında keń túsinikler berdi. Puqaralardı qıynap atırǵan máselelerdi ornında úyreniw, olardı sheshiwde deputatlıq qadaǵalawdı kúsheytiw zárúr ekenligi atap ótildi. 

Ilaj dawamında aymaq xalqı ózleriniń qızıqtırǵan sorawları menen múrájat etip, sociallıq máseleler boyınsha pikir-usınısların bildirdi. Bildirilgen múrájatlar deputatlar tárepinen tıńlanıp, olardı sheshiw boyınsha tiyisli ilajlar kóriletuǵını atap ótildi.