Toshloq tumani O‘zbekiston mahallasida tuman Kengashi kotibiyati mudiri M.Qoraboyeva kotibiyat bosh mutaxassisi M.Mahmudovlar tomonidan mahalla yettiligi a’zolari bilan uchrashuv tashkil etildi. Mazkur uchrashuv davomida mahallada olib borilayotgan ishlar, aholi murojaatlari hamda hududda mavjud muammolar yuzasidan atroflicha fikr almashildi.

Uchrashuvda O‘zbekiston Respublikasi Prezidentining 2023-yil 21-dekabrdagi PF-209-sonli “Mahallalarda boshqaruv tizimini yanada takomillashtirish chora-tadbirlari to‘g‘risida”gi Farmoni asosida mahalla yettiligi zimmasiga yuklatilgan vazifalar ijrosi muhokama qilindi. Xususan, mahalla obodligini ta’minlash, “Obod mahalla", "Obod ko‘cha”, “Obod xonadon” mezonlarini joriy etishda aholining faol ishtiroki va mas’uliyatini oshirish, mahallada kambag‘allikni qisqartirish, aholi bandligini ta’minlash, yoshlar va xotin-qizlar bilan ishlash, ijtimoiy himoyaga muhtoj oilalarni qo‘llab-quvvatlash hamda huquqbuzarliklarning oldini olish borasida amalga oshirilayotgan ishlar o‘rganildi.

O‘rganish davomida mahalla aholisi tomonidan ko‘tarilgan mahalladagi infratuzilma masalalari, yo‘l va obodonlashtirish ishlariga oid masalalar atroflicha tinglandi. Aniqlangan muammolarni bartaraf etish yuzasidan tegishli tashkilot va mutasaddi idoralarga so‘rovlar yuborish belgilab olindi.