Medicina xızmetkerlerine jańa imkaniyatlar hám jeńillikler túsindirildi.

Bunnan soń Ózbekstan Respublikası Oliy Majlisi Nızamshılıq palatası deputatı N. Rashidova, Qaraqalpaqstan Respublikası Joqarǵı Keńesi deputatı Sh. Asanova hám de Ózbekstan «Adolat» SDP Qaraqalpaqstan Respublikası Keńesi baslıǵı orınbasarı Sh. Toreshova Taxtakópir rayonında bolıp, rayon hákimi orınbasarı Sh. Bekturǵanov hám rayonlıq Keńes sekretariatı baslıǵı T. Jusipov penen birgelikte, rayonlıq medicina birlespesinde bolıp, medicina xızmetkerlerine Prezidentimizdiń 27-oktyabr kúni ótkerilgen selektor májilisinde berilgen tapsırma hám jeńillikler menen tanıstırdı.
Ushırasıw dawamında mámleketimiz basshısı tárepinen medicina tarawın jáne de rawajlandırıw, xalıqqa kórsetiletuǵın medicina xızmetleriniń sapasın arttırıw, medicina xızmetkerlerin materiallıq hám sociallıq jaqtan qollap-quwatlaw boyınsha belgilengen wazıypalarǵa ayrıqsha itibar qaratıldı.
Atap aytqanda, medicina xızmetkerleriniń kásiplik bilimin hám tájiriybesin arttırıw, olardıń miynetin materiallıq jaqtan qollap-quwatlaw, shetki aymaqlarda jumıs islewshi shıpakerlerge qosımsha tólemler belgilew, jas qánigelerge ipoteka kreditiniń dáslepki tóleminiń bir bólegin qaplap beriw sıyaqlı jeńillikler haqqında maǵlıwmatlar berildi.
Sonday-aq, 2027-jıldan baslap medicina xızmetkerleriniń mamanlıǵın tastıyıqlaw hám mámleketlik dizimnen ótiw sistemasın engiziw, rezidenturada oqıw ushın jańa imkaniyatlar jaratıw, shıpakerler hám medicina hámshıralarınıń miynetin xızmet sapası hám puqaralardıń razılıǵı tiykarında bahalaw másелeleri de talqılandı.
Ushırasıwda medicina tarawında ámelge asırılıp atırǵan reformalardıń tiykarǵı maqseti — xalıqqa sapalı medicina xızmetin kórsetiw, medicina xızmetkerleriniń miynetin qádirlew hám olardıń kásiplik rawajlanıwı ushın zárúr sharayatlar jaratıw ekenligi atap ótildi.