Ijtimoiy himoya — e’tibor markazida: “Tinchlik” mahallasidagi ehtiyojmand oilalar holati o‘rganildi

Xalq deputatlari Termiz shahar Kengashining 12-“Saxovat” saylov okrugi deputati X. Jurayev “Tinchlik” mahallasida bo‘lib, aholining ijtimoiy himoyaga muhtoj qatlamini qo‘llab-quvvatlash, ijtimoiy xizmatlar sifati hamda ehtiyojmand oilalar bilan ishlash holatini o‘rgandi.

Mazkur o‘rganish O‘zbekiston Respublikasining “Keksalar, nogironligi bo‘lgan shaxslar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida”gi O‘RQ–415-son Qonuni talablari asosida amalga oshirildi.
O‘rganish davomida quyidagi masalalarga alohida e’tibor qaratildi:

▪️ yolg‘iz keksalar va parvarishga muhtoj fuqarolar bilan ishlash holati;

▪️ nogironligi bo‘lgan shaxslarga ko‘rsatilayotgan ijtimoiy xizmatlarning sifati;

▪️ ehtiyojmand oilalarni aniqlash va ularga manzilli ko‘mak ko‘rsatish;

▪️ ijtimoiy xizmatlarning o‘z vaqtida va adolatli yetkazilishi;

▪️ fuqarolar murojaatlari bilan ishlash hamda ijtimoiy reyestrlar yuritilishi.

“Tinchlik” mahallasidagi ijtimoiy reyestr ko‘rsatkichlari

Taqdim etilgan ma’lumotlarga ko‘ra, mahallada ijtimoiy reyestrga kiritilgan jami 70 ta oila mavjud. Jumladan:

▪️ 18 ta oila — davlat ta’minotidagi oilalar;

▪️ 52 ta oila — kambag‘al oilalar;

▪️ kambag‘al oilalarning 42 tasi — kambag‘allik chegarasidagi oilalar sifatida qayd etilgan.

Shuningdek, taqdim etilgan jadvalda ijtimoiy reyestrdan chiqarilgan oilalar soni 6 ta deb ko‘rsatilgan.

O‘rganish yakunida ijtimoiy xizmatlar sifatini yanada oshirish, ijtimoiy himoyaga muhtoj fuqarolar bilan manzilli ishlashni kuchaytirish hamda aniqlangan masalalarni hal etish yuzasidan tegishli tavsiya va ko‘rsatmalar berildi.

Deputatlik nazorati — aholi muammolarini o‘rganish, ehtiyojmand fuqarolar manfaatlarini himoya qilish va mahallada ijtimoiy qo‘llab-quvvatlash samaradorligini oshirishga xizmat qiladi.