АЁЛ ҚАДРИ, БОЛА ҲУҚУҚИ ВА ОИЛА ОСОЙИШТАЛИГИ — ЖАМИЯТ ЭЪТИБОРИДА

АЁЛ ҚАДРИ, БОЛА ҲУҚУҚИ ВА ОИЛА ОСОЙИШТАЛИГИ — ЖАМИЯТ ЭЪТИБОРИДА
Ҳар бир хотин-қиз тазйиқ ва зўравонликдан холи, ҳар бир бола эса меҳр-эътибор ва хавфсиз муҳитда яшашга ҳақли. Бу ҳуқуқларни ҳимоя қилиш, оилаларда соғлом муҳитни мустаҳкамлаш ҳамда ёшларнинг келажагига бефарқ бўлмаслик барчамиздан масъулият талаб этади.
Бугун Янгиқўрғон туманидаги 45-сонли умумтаълим мактабининг мажлислар залида хотин-қизларни тазйиқ ва зўравонликдан ҳимоя қилиш, болалар ҳуқуқларини таъминлаш, вояга етмаганлар ўртасида жиноятчилик ҳамда эрта турмушнинг олдини олиш масалаларига бағишланган учрашув бўлиб ўтди.
Учрашувда Омбудсманнинг Наманган вилояти бўйича минтақавий вакили Жаҳонгир Валиев, Олий Мажлис Қонунчилик палатаси депутати Ҳилола Каримжоновна Юсупова, Халқ депутатлари Наманган вилояти Кенгаши депутати Наргиза Лапасовна Муҳаммадиева, Халқ депутатлари Янгиқўрғон тумани Кенгаши раиси Равшан Рахмонжонович Мамажонов, туман ИИБ катта инспектори, катта лейтенант Муаттар Муродова ҳамда «Инсон» ижтимоий хизматлар маркази ходимлари иштирок этдилар.
Тадбирда Обод, Бешбулоқ, Қўриқ, Қорасув ва Юксалиш маҳалла фуқаролар йиғинлари аҳолиси қатнашди.
ТАЗЙИҚ ВА ЗЎРАВОНЛИККА БЕФАРҚ БЎЛМАЙЛИК!
Йиғилишда хотин-қизларга нисбатан тазйиқ ва зўравонликнинг олдини олиш, уларнинг шаъни ва қадр-қимматини асраш, оилада ўзаро ҳурмат ҳамда соғлом муносабатларни қарор топтириш масалалари муҳокама қилинди.
Зўравонлик инсон қалбида оғриқ, оилада қўрқув ва ишончсизлик қолдиради. Шу боис, бундай ҳолатларнинг олдини олишда муаммоларни ўз вақтида пайқаш, жабр кўраётган инсонни ёлғиз қолдирмаслик ва унга кўмак бериш муҳим аҳамиятга эга.
БОЛАНИНГ БУГУНГИ ҲИМОЯСИ — УНИНГ ЭРТАНГИ КЕЛАЖАГИ
Учрашувда болаларнинг ҳуқуқ ва қонуний манфаатларини ҳимоя қилиш, уларнинг хавфсизлиги, таълим-тарбияси ҳамда соғлом улғайиши билан боғлиқ масалаларга алоҳида эътибор қаратилди.
Вояга етмаганлар ўртасида жиноятчилик ва ҳуқуқбузарликларнинг олдини олишда ота-оналар, таълим муассасалари, маҳалла ҳамда масъул ташкилотлар ҳамкорлиги муҳим. Фарзанднинг кимлар билан мулоқот қилаётгани, бўш вақтини қандай ўтказаётгани, уни нималар ташвишга солаётганига эътибор бериш — тарбиянинг ажралмас қисмидир.
Болани тинглаш, унинг фикрини ҳурмат қилиш ва қийин вазиятда қўллаб-қувватлаш орқали кўплаб муаммоларнинг олдини олиш мумкин.
ЭРТА ТУРМУШ — ЁШЛАР КЕЛАЖАГИГА ДАХЛДОР МАСАЛА
Йиғилишда эрта турмушнинг салбий оқибатлари, ёшларнинг саломатлиги, таълим олиши, касб-ҳунар эгаллаши ва мустақил ҳаётга тайёрланишига таъсири ҳақида ҳам сўз юритилди.
Оила қуриш катта масъулиятни талаб этади. Ёшларнинг билим олиши, ҳунар ўрганиши ва ҳаётда ўз ўрнини топиши учун шароит яратиш уларнинг келгусида мустаҳкам оила барпо этишига хизмат қилади.
Мазкур учрашув аҳолининг ҳуқуқий хабардорлигини ошириш, оила ва маҳалладаги муаммоларга эътиборни кучайтириш ҳамда хотин-қизлар ва болалар манфаатларини ҳимоя қилиш масалаларини биргаликда муҳокама этишга қаратилди.
Бир инсоннинг дардига ўз вақтида эътибор бериш — бир оиланинг осойишталигини асрашга, бир боланинг келажагини ҳимоя қилишга сабаб бўлиши мумкин. Зўравонликка бефарқ бўлмайлик, фарзандларимиз тақдирига масъулият билан ёндашайлик!