Xalıq deputatları Qaraózek rayonlıq Keńesiniń gezektegi jigirma tórtinshi sessiyası bolıp ótti.

Xalıq deputatları Qaraózek rayonlıq Keńesiniń gezektegi jigirma tórtinshi sessiyası bolıp ótti.

Sessiyanı Keńes baslıǵı G.Yusupova basqarıp bardı. Sessiya reglamenti belgilenip, deputatlar májilis xatkeri hám kún tártibin tastıyıqladı. Sessiyaǵa rayonlıq Keńes deputatları, Keńes janındaǵı jaslar másláhát toparı, ekspert aǵzaları, hákim orınbasarları, siyasiy partiyalar, rayonlıq mákeme, shólkemler, puqaralar jıyınları hám ǵalaba xabar qurallarınıń wákilleri qatnastı.
Sessiya jumısı Keńestiń social tarmaqtaǵı arnawlı betlerinde tuwrıdan-tuwrı jarıtılıp barıldı. Sessiya kún tártibinde dáslep Qaraózek rayonında xalıqtıń mashqalaları hám múrájatları menen islesiw sistemasın jańa dárejege kóteriw hám jámiyetlik pikirdi tereń tallaw baǵdarında Qarshı qalası tájiriybesi tiykarında ámelge asırılatuǵın ilajlar rejesi boyınsha 2026-jıl úshinshi sheregi dawamında ámelge asırılǵan jumıslar haqqında rayon hákimi Baymuratov Anvar Maxsetovichtiń esabatı tıńlandı.
Bul másele boyınsha tiyisli taraw wákillerine múrájatlar menen islesiw baģdarında wazıypalar belgilenip, sheshim qabıl etildi. Kún tártibindegi Ózbekstan Respublikası Prezidentiniń 2026-jıl 5-yanvar kúngi «Respublika máhállelerinde qáwipsiz ortalıq jaratıw baǵdarında tutas mánzilli islew sistemasın engiziwge qaratılǵan qosımsha ilajlar haqqında»ǵı PQ-1-sanlı qararınıń orınlanıwı boyınsha 2026-jıldıń úshinshi sheregi dawamında Qaraózek rayonı aymaǵında ámelge asırılǵan jumıslar haqqında rayon prokurorı E.Auezovtıń málimlemesi dodalanıldı. Deputatlardıń usınısları menen sheshim qabıl etildi. Sessiyada Qaraózek rayonı Ishki isler bólimi baslıǵı M.Allabergenovtıń rayon aymaǵında jınayatshılıqqa qarsı gúresiw, huqıqbuzarlıqlardıń aldın alıw hám jámiyetlik tártipti saqlaw, puqaralardıń qáwipsizligin támiyinlew baǵdarında 2026-jıldıń toǵız ayı dawamında ámelge asırılǵan jumıslar haqqındaǵı esabatı kórip shıǵıldı. Sonday-aq, sessiya kún tártibine muwapıq rayon hákimi orınbasarı A.Sarsenbaevtıń Qaraózek rayonında kámbaǵallıq dárejesin qısqartıw baǵdarında ámelge asırılǵan jumıslar haqqında esabatı, rayon hákimligi janındaǵı “Infrastruktura hám sociallıq turaqlılıq” qorı esabınan qarjı ajıratıw hám jergilikli byudjet dáramatları rejesiniń 2026-jıldıń birinshi hám ekinshi sheregi jaǵdayına arttırıp orınlanǵan bólegi esabınan qarjılardıń bólistiriliwi haqqında usınısları kórip shıǵılıp, deputatlar tárepinen usınıslar bildirildi hám tastıyıqlandı. Sessiya kún tártibindegi Qaraózek rayonındaǵı xalıqtıń sociallıq mútájligi bar qatlamın 2027-jılda jumısqa jaylastırıw ushın jumıs orınlarınıń eń kem sanın belgilew hám rezervke qoyıw haqqında rayonlıq Kámbaǵallıqtı qısqartıw hám bántlikke kómeklesiw bólimi direktorı S.Jankabulovtıń usınısı kórip shıǵıldı. Deputatlar bul máseleni talıqlap, tiyislisinshe tastıyıqladı. Sessiya kún tártibine usınılǵan Qaraózek rayonında 2026-2027-jıllarda gúz-qıs máwsimlerinde awıl xojalıǵı eginlerin suwǵarıw hám shor juwıw ushın suw alıw limitlerin tastıyıqlaw haqqında rayonlıq “Suw jetkerip beriw xızmeti” mámleketlik mákemesi direktorı M.Orazbaevtıń usınısı kórip shıǵıldı hám deputatlardıń usınısları menen sheshim qabıl etildi. Sessiyada Xalıq deputatları rayonlıq Keńesiniń turaqlı komissiyaları tárepinen usınılǵan máseleler tolıǵı menen kórip shıǵılıp, sheshimler qabıl etildi.
Deputatlar, siyasiy partiya deputatlıq toparları tárepinen kún tártibindegi máseleler boyınsha pikir, usınıslar bildirildi, tarawlarda aldaǵı isleniwi tiyis wazıypalar belgilendi hám jigirma tórtinshi sessiya óz jumısın juwmaqladı.