MEKTEP OQÍWShÍLARÍ JÁMIYETLIK TRANSPORTÍNAN PAYDALANÍWDA JEŃILLIKKE IYE BOLÍWÍ KEREK

MEKTEP OQÍWShÍLARÍ JÁMIYETLIK TRANSPORTÍNAN PAYDALANÍWDA JEŃILLIKKE IYE BOLÍWÍ KEREK
      Mektep oqıwshılarınıń jámiyetlik transportınan paydalanıwında birden-bir jeńillikli tariflerdi hám jeńillikke iye bolıw huqıqın belgilew boyınsha nızamshılıqtı jetilistiriw búgingi kúnde áhmiyetli sanaladı. Sebebi mámleketimizde jaslarǵa bolǵan mámleketlik siyasattıń hám bilimlendiriw tarawındaǵı túpkilikli reformalardıń basqıshpa-basqısh turmısımızǵa engiziliwi, xalıqaralıq tájiriybe menen sáykesligin inabatqa alıp bul másele aktuallıǵın kórsetedi.
     Mektep oqıwshılarınıń jámáátlik transportlardan paydalanıwı, jol haqısın tólewinde tariflik sistemanı qáliplestiriw búgingi kúnniń talabı dep oylayman. Óytkeni mámleketimizde ulıwma orta bilim beriw hám joqarı tálimde imkaniyatlar, jeńillikler ajıratılıwı, jaslarımızdıń bilim, kásip iyelewine sharayat jaratılıwı nátiyjesinde kóplegen jaslar ushın jańa imkaniyat esigi ashıldı.
     Jámiyetlik transportlardan paydalanıwshı mektep oqıwshıları jol haqı qárejetlerin basqa shaxslar menen teń halatta tólewi olardıń ata-anaları tárepinen usınıslar, múrájatlar payda etpekte. Sonlıqtan oqıwshılar ushın óz aldına qolaylı tariflik sistemanı ámeliyatqa engiziw zárúr.
     Usı tiykarda mektep oqıwshılarınıń jámiyetlik transportınan paydalanıwın nızamshılıq dárejesinde belgilewdi usınıs etemen. Bunda álbette aymaqlardıń social-ekonomikalıq jaǵdayın esapqa alǵan halda tariflerdi belgilew maqsetke muwapıq boladı.


KARMISOVA Rayxan Atajanovna,
Xalıq deputatları Qaraózek rayonlıq Keńesi 7-sanlı «Shayxanakópir» saylaw okrugi deputatı, ÓzXDP deputatlıq toparı baslıǵı.