Inklyuziv ta’lim: 4-sonli umumta’lim maktabida nogironligi bo‘lgan bolalar uchun yaratilgan sharoitlar o‘rganildi

Har bir bolaning sifatli ta’lim olishi uchun teng imkoniyatlar yaratish, uning huquq va manfaatlarini ta’minlash hamda ta’lim muassasalarida to‘siqsiz va xavfsiz muhitni shakllantirish muhim vazifalardan biridir.

Shu maqsadda, Xalq deputatlari Termiz shahar Kengashining 19-“Ma’rifat” saylov okrugi deputati, Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasi hamda ekspert guruhi rahbari A.Mustafakulov Kengash kotibiyati bosh mutaxassisi R.Mamashukurov bilan birgalikda “Ma’rifat” mahallasida joylashgan 4-sonli umumta’lim maktabida nazorat-tahlil tadbirini o‘tkazdi.
Mazkur tadbir Xalq deputatlari Termiz shahar Kengashining 2026-yil 22-iyundagi VII-22-53-8-121-K/26-sonli qarori ijrosini o‘rganish, xususan, nogironligi bo‘lgan bolalar uchun to‘siqsiz muhit yaratish, inklyuziv sinflar faoliyatini tashkil etish hamda korreksion xonalarni zarur jihozlar bilan ta’minlash borasida belgilangan vazifalarning amaliy ijrosini baholash maqsadida tashkil etildi.

O‘rganish davomida quyidagi yo‘nalishlarga alohida e’tibor qaratildi:

maktab binosiga kirish va hudud bo‘ylab erkin harakatlanish uchun yaratilgan shart-sharoitlar;

nogironligi bo‘lgan o‘quvchilarning ta’lim olishi uchun tashkil etilgan qulayliklar va to‘siqsiz muhit holati;

inklyuziv sinflarning faoliyati hamda o‘quvchilarning ta’lim jarayonida teng ishtirok etishi uchun yaratilgan imkoniyatlar;

korreksion xonalarning zarur jihozlar bilan ta’minlanganligi va ulardan foydalanish holati;

Kengash qarorida belgilangan vazifalarning o‘z vaqtida hamda sifatli bajarilishi.

O‘rganish jarayonida maktab ma’muriyatining mazkur yo‘nalishda amalga oshirgan ishlari, erishilgan natijalar va mavjud imkoniyatlar atroflicha tahlil qilindi. Shuningdek, alohida ta’lim ehtiyojlariga ega o‘quvchilarning ta’lim olishi, ularni pedagogik jihatdan qo‘llab-quvvatlash hamda maktab muhitiga moslashuvi uchun yaratilgan tashkiliy sharoitlar ko‘rib chiqildi.

Nazorat-tahlil natijalariga ko‘ra, maktabda nogironligi bo‘lgan bolalar uchun to‘siqsiz muhit yaratish, inklyuziv sinflarni tashkil etish va korreksion xonalarni jihozlash bo‘yicha belgilangan vazifalar sifatli hamda tegishli talablar asosida amalga oshirilgani qayd etildi.

Ta’kidlanganidek, bunday sharoitlarning yaratilishi bolalarning nafaqat bilim olishi, balki ijtimoiy faolligini oshirish, tengdoshlari bilan muloqot qilish, jamoaga moslashish va o‘z qobiliyatlarini namoyon etishida ham muhim ahamiyat kasb etadi.

Shu bilan birga, inklyuziv ta’lim samaradorligini yanada oshirish, mavjud imkoniyatlardan oqilona foydalanish, o‘quvchilarning individual ehtiyojlarini inobatga olish hamda yaratilgan sharoitlarni muntazam takomillashtirib borish yuzasidan tegishli tavsiyalar berildi.

Mazkur nazorat-tahlil tadbiri Kengash qarorlari ijrosini joylarda o‘rganish, ta’lim sohasida belgilangan vazifalarning natijadorligini baholash va fuqarolarning, xususan, alohida ta’lim ehtiyojlariga ega bolalarning huquq hamda manfaatlarini ta’minlashga qaratilgan samarali deputatlik nazoratining muhim yo‘nalishlaridan biri hisoblanadi.

Zero, har bir bola e’tibor, g‘amxo‘rlik va sifatli ta’lim olishga haqli. Teng imkoniyatlar yaratish esa inson qadrini ulug‘lash va hech bir bolani ta’limdan chetda qoldirmaslikning muhim shartidir.