“Ma’rifat” mahallasida fuqarolar muammolari joyida o‘rganildi

Aholi bilan yuzma-yuz muloqot qilish, fuqarolarni qiynayotgan muammolarni joyida o‘rganish hamda ularning qonuniy manfaatlarini himoya qilish deputatlik faoliyatining ustuvor yo‘nalishlaridan hisoblanadi.

Shu maqsadda, Xalq deputatlari Termiz shahar Kengashining 19-“Ma’rifat” saylov okrugi deputati, ekspert guruhi a’zosi A.Mustafakulov hamda Kengash kotibiyati bosh mutaxassisi R.Mamashukurovlar “Ma’rifat” mahallasida bo‘lib, aholi bilan uchrashuv o‘tkazdilar.
Uchrashuv davomida fuqarolar bilan mahallaning bugungi kundagi holati, hududda mavjud muammolar, aholini qiynayotgan masalalar hamda ularni hal etish yo‘llari yuzasidan ochiq va samimiy suhbat olib borildi. Muloqot jarayonida aholining fikr-mulohazalari, taklif va murojaatlari tinglanib, ko‘tarilgan masalalarning mazmun-mohiyati atroflicha o‘rganildi.

Xususan, fuqarolar tomonidan quyidagi masalalar ko‘tarildi:

Ichki yo‘llarni ta’mirlash — mahalla hududidagi ichki yo‘llarning holatini yaxshilash, ta’mirtalab yo‘l qismlarini tartibga keltirish hamda aholining qulay va xavfsiz harakatlanishi uchun zarur choralarni ko‘rish;

Elektr energiyasi ta’minoti — elektr energiyasi bilan bog‘liq yuzaga kelayotgan muammolarni o‘rganish, ta’minot barqarorligini yaxshilash va mavjud kamchiliklarni bartaraf etish masalalari.

Bildirilgan murojaatlar yuzasidan mas’ul tashkilotlar tomonidan tegishli o‘rganishlar olib borilishi, muammolarning sabablarini aniqlash va ularni bartaraf etish bo‘yicha amaliy choralar ko‘rilishi muhimligi ta’kidlandi.

Shuningdek, aholini qiynayotgan masalalarga befarq bo‘lmaslik, har bir murojaatni e’tibor bilan ko‘rib chiqish hamda ularning yechimi yuzasidan tegishli tashkilotlar bilan hamkorlikda ishlash zarurligiga alohida e’tibor qaratildi.

Deputatlik faoliyatining asosiy maqsadi — fuqarolar manfaatlarini himoya qilish, ularning murojaatlari asosida hududlardagi dolzarb muammolarni aniqlash va yechimi yuzasidan tegishli choralar ko‘rilishiga ko‘maklashishdan iborat.

“Ma’rifat” mahallasida o‘tkazilgan ushbu uchrashuv ham aholi bilan doimiy muloqotni yo‘lga qo‘yish, mavjud muammolarni manzilli o‘rganish va ularni hal etish borasidagi ishlarning muhim qismi hisoblanadi.

Xalq deputatlari Termiz shahar Kengashi aholi murojaatlarini o‘rganish, fuqarolar manfaatlarini ta’minlash hamda mahallalardagi dolzarb masalalarni hal etish yuzasidan deputatlik nazoratini amalga oshirishga alohida e’tibor qaratadi.