Kambag‘allikni qisqartirish va aholi daromadlarini oshirish yo‘nalishidagi ishlar o‘rganildi

Xalq deputatlari Qo‘qon shahar Kengashiga 19-“Saoqat” saylov okrugidan saylangan deputat I.Fayzullayev tomonidan “Sobir Abdulla” mahalla fuqarolar yig‘inida navbatdagi saylovchilar bilan uchrashuv hamda o‘rganish ishlari olib borildi.

O‘tkazilgan uchrashuv va o‘rganish jarayonlarida Xalq deputatlari Qo‘qon shahar Kengashi kotibiyati bosh mutaxassislari X.Abdullayev va A.Adhamov tomonidan amaliy ko‘mak ko‘rsatildi.

O‘rganish davomida 3-sentabr kuni davlatimiz rahbari raisligida kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish masalalari yuzasidan o‘tkazilgan videoselektor yig‘ilishida belgilangan vazifalar ijrosi yuzasidan mahallada amalga oshirilayotgan ishlar joyiga chiqqan holda o‘rganildi.

Jumladan, “Kambag‘allik reyestri”ga kiritilgan Yangi dehqon ko‘chasi 7-uyda yashovchi M.Jo‘rayevaning bandligini ta’minlash va daromad manbasini yaratish maqsadida amaliy yordam ko‘rsatilib, uning o‘zini o‘zi band qilishi hamda tikuvchilik sexi tashkil etishi uchun zarur ko‘mak berildi. Natijada fuqaroning barqaror daromad manbaiga ega bo‘lishi ta’minlanib, “Kambag‘allik reyestri”dan chiqarilishiga erishildi.

Muloqotlar davomida “Mahalla yettiligi” hamkorligida kambag‘allikni qisqartirish borasidagi ishlarni yanada kuchaytirish, har bir oila uchun barqaror daromad manbalarini yaratish, fuqarolarni kasb-hunarga o‘qitish va ularning bandligini ta’minlash masalalariga alohida e’tibor qaratildi.

 Xalq deputatlari Qo‘qon shahar Kengashi