XONADONLARDA AHOLI BANDLIGI VA DAROMAD MANBALARI O‘RGANILISHI DAVOM ETMOQDA

Xalq deputatlari G‘ozg‘on shahar Kengashi deputati, shahar hokimi Nurali Jo‘rayev mahallalarda aholi bandligini ta’minlash, kambag‘allikni qisqartirish hamda fuqarolarning daromadlarini oshirish borasida amalga oshirilayotgan ishlarni o‘rganish maqsadida Marmarobod mahallasidagi xonadonlarga kirib, oilalarning yashash sharoiti, bandlik holati va daromad manbalarini bevosita o‘rgandi.

O‘rganish davomida ishsiz fuqarolarni bandlikka jalb etish, xonadonlarda mavjud imkoniyatlardan samarali foydalanish, tadbirkorlik va hunarmandchilikni rivojlantirish orqali oilalar daromadini oshirish masalalariga alohida e’tibor qaratildi.

Fuqarolar tomonidan bildirilgan muammo va takliflar tinglanib, ularni hal etish hamda ehtiyojmand oilalarni qo‘llab-quvvatlash yuzasidan mas’ullarga tegishli topshiriqlar berildi.