HOKIM YORDAMCHISI FAOLIYATI JOYIGA CHIQIB O‘RGANILDI

Xalq deputatlari Quva tuman Kengashi deputati B.Abduraximov hamda Kengash kotibiyati
bosh mutaxassisi M.To‘xtasinov tomonidan Gulobod mahalla fuqarolar yig‘inida
hokim yordamchisining aholi bandligini ta’minlash, oilaviy tadbirkorlikni
rivojlantirish va fuqarolarni daromadli mehnatga jalb etish borasida amalga
oshirayotgan faoliyati manzilli o‘rganildi.

O‘rganish davomida hokim yordamchisining amaliy ko‘magida imtiyozli kredit mablag‘lari
asosida parrandachilik va qo‘ychilik yo‘nalishida o‘z faoliyatini yo‘lga
qo‘ygan yosh tadbirkor xonadoniga tashrif buyurildi. Tadbirkor tomonidan kredit
mablag‘lari hisobidan tovuq va jo‘jalar, shuningdek, 7 bosh qo‘y xarid qilinib,
xonadonda kichik chorvachilik va parrandachilik xo‘jaligi tashkil etilgani, bu
orqali oilaning daromad manbai kengaytirilib, kelgusida xo‘jalik faoliyatini
yanada rivojlantirish bo‘yicha amaliy ishlar olib borilayotgani o‘rganildi.

Shuningdek, tadbirkorlikni yanada qo‘llab-quvvatlash, mavjud imkoniyatlardan samarali
foydalanish hamda davlat tomonidan yaratilayotgan imtiyoz va ko‘mak
mexanizmlaridan unumli foydalanish yuzasidan hokim yordamchisi hamda
tadbirkorga tegishli tavsiyalar berildi.

O‘rganish jarayonida aniqlangan ayrim kamchilik va muammolar deputat tomonidan “Deputatning
ko‘cha aylanish daftari”ga kiritilib, ularni bartaraf etish hamda
qonunchilik talablari ijrosini ta’minlash yuzasidan tegishli chora-tadbirlar
belgilandi va nazoratga olindi.