Dostonobod MFYda katta investitsiya loyihasi amalga oshirilmoqda

             O‘zbekiston Respublikasi Prezidentining 2026-yil 16-fevraldagi PQ-62-sonli qarori ijrosini ta’minlash hamda Andijon viloyatini ijtimoiy-iqtisodiy rivojlantirishni jadallashtirish maqsadida tizimli ishlar olib borilmoqda. Xususan, «Dostonobod» MFY hududida chet ellik investorlar tomonidan yirik parrandachilik kompleksini tashkil etish loyihasi yo‘lga qo‘yildi. Mazkur yirik loyihaning borishi Xalq deputatlari tuman Kengashi deputati, kotibiyat mudiri
I.Jo‘rayev, deputat, kotibiyat bosh mutaxassisi Yo.Tadjibayeva hamda M.Salibayevalar tomonidan joyiga chiqqan holda o‘rganildi. O‘rganish natijalariga ko‘ra: Parrandachilik kompleksi tashkil etish uchun zarur yer maydoni ajratilgan, qurilish va tashkiliy ishlar «Baraka parranda invest» xususiy korxonasi tomonidan jadallik bilan olib borilmoqda. Bu kabi yirik investitsiya loyihalari hududda yuzlab yangi ish o‘rinlari yaratilishi va ichki bozorni sifatli mahsulot bilan ta’minlashga xizmat qiladi.