Deputat, nuranıyler menen ushırasıwı

Xalıq deputatları Bozataw rayonlıq Keńesi 6-sanlı «Andijan» saylaw okruginen saylanǵan deputat Sh.Berdaxov, rayonlıq Keńes sekretariatınıń bas qánigesi Q.Aitmuratov menen birgelikte rayon nuranıyları menen ushırasıw ótkerdi.
Ushırasıw dawamında nuranıylar menen elimizde ámelge asırılıp atırǵan keń kólemli reformalar, aymaqlardı rawajlandırıw, xalıqtıń turmıs sapasın jaqsılaw hám jas áwladtı watansúyiwshilik ruhında tárbiyalaw máseleleri boyınsha ashıq sáwbetlesiwler alıp barıldı.
Nuranıylar ózleriniń kóp jıllıq turmıslıq tájiriybesine tayanıp, jámiyette awızbirshilik hám tatıwlıqtı bekkemlew, milliy qádiriyatlardı qásterlep saqlaw, jaslar arasında kitapqumarlıqtı rawajlandırıw, miynetke húrmet sezimin qáliplestiriw boyınsha bahalı usınısların bildirdi.
Deputat tárepinen bildirilgen pikir-usınıslar dıqqat penen tıńlanıp, olardı ámelge asırıw boyınsha tiyisli ilajlar belgilep alındı. Sonday-aq, nuranıylar menen bunday ushırasıwlardı úzliksiz jolǵa qoyıw hám olardıń tájiriybesinen keńnen paydalanıw áhmiyetli ekenin atap ótildi.
Bunday qızǵın ushırasıwlar xalıq penen qatnasıqtı bekkemlewge, nuranıylardıń tájiriybesin qádirlewge hám jámiyetimizdiń turaqlı rawajlanıwına xızmet etedi.