Deputatlar Doval awılında puqaralar menen ushırasıw ótkerdi

Xalıq deputatları Bozataw rayonlıq Keńesi sekretariatı baslıǵı A.Ibragimov hám 11-sanlı “Ustalar elatlı” saylaw okruginen deputat B.Nurlımuratova tárepinen óz saylaw okrugi aymaǵındaǵı Doval awılında jasawshı puqaralar menen gezektegi ushırasıw ótkerildi.
Ushırasıw dawamında awıl turǵınlarınıń turmısına tiyisli bolǵan sociallıq-ekonomikalıq máseleler, infrastruktura jaǵdayı, suwdan paydalanıw, egin jerlerin suw menen támiyinlew hám basqa da kóplegen mashaqalalar boyınsha puqaralardıń pikir hám usınısları tıńlandı.
Ásirese, puqaralar tárepinen Doval awılı ustınen ótiwshi “Keneges” japına suw jetip kelmewi máselesi kóterildi. puqaralardıń aytıwınsha, házirgi waqıtta jap arqalı suw aǵımınıń toqtap qalıwı yamasa jetkilikli dárejede kelmewi sebepli awıldaǵı 38 xojalıqtıń qiytaq jer eginleri suw jetispewshiliginen eginlerdiń ósip-rawajlanıwına keri tásir etiw qáwpi payda bolıp, miynet penen egilgen diyqanshılıq ónimleri zıyan kóriwi múmkinligi bildirildi.
Deputatlar tárepinen kóterilgen másele ornında úyrenilip, puqaralardıń pikirleri jazıp alındı. Sonıń menen bir qatarda suw jetkiziw sistemasınıń házirgi jaǵdayı boyınsha tiyisli máseleler talqılanıp, juwapker shólkemler menen birgelikte máseleni sheshiw ilajları kórip shıǵılatuǵınlıǵı bildirildi.