DEPUTAT SO‘ROVI YUBORILDI

Xalq deputatlari G‘ozg‘on shahar Kengashi deputati Farxod Xojiyev tomonidan G‘ozg‘on shahar 1-sonli davlat maktabgacha ta’lim tashkilotida bolalar xavfsizligi bilan bog‘liq holat o‘rganildi.

O‘rganishlar davomida muassasa hududida issiq va sovuq suv tarmoqlarini tortish ishlari uchun qazilgan transheyalar uzoq muddat davomida ochiq holda qoldirilgani, ayrim joylarda xavfsizlik to‘siqlari hamda ogohlantiruvchi belgilar yetarli darajada o‘rnatilmagani aniqlandi.

Mazkur holat:

bolalarning chuqurlikka yiqilib tushishi va tan jarohati olishi;
nazoratsiz hududlarga kirib ketishi;
favqulodda holatlarda evakuatsiya yo‘llarining cheklanishi;
sanitariya-gigiyena holatining yomonlashishi kabi salbiy oqibatlarga sabab bo‘lishi mumkin.
Shu munosabat bilan deputat tomonidan G‘ozg‘on shahar maktabgacha va maktab ta’limi bo‘limi boshlig‘i v.v.b. M.Qo‘shoqov nomiga deputat so‘rovi yuborilib, bolalar xavfsizligiga tahdid soluvchi omillarni zudlik bilan bartaraf etish, mas’ul tashkilotlar faoliyatiga huquqiy baho berish hamda ko‘rilayotgan choralar yuzasidan asoslantirilgan yozma ma’lumot taqdim etish so‘raldi.

Fuqarolar, ayniqsa yosh avlodning hayoti va sog‘lig‘ini muhofaza qilish deputatlik faoliyatining ustuvor yo‘nalishlaridan biri bo‘lib qoladi.