Депутат ёшлар билан учрашди

"Ёшлар куни" муносабати билан Пахтаобод туманидаги "Нодирабегим" маҳалласи ҳудудида жойлашган “The Best Tekstil” корхонасида ишсиз ёшлар бандлигини таъминлаш мақсадида меҳнат ярмаркаси ташкил этилди. 

Тадбир якунида 8-Қорашоҳ сайлов округидан сайланган депутат, туман ҳокими Давронбек Ҳасанбоевич Саттаров ёшлар билан самимий мулоқот ўтказди. Суҳбат давомида йигит-қизларнинг муаммо ва таклифлари тингланиб, уларни касб-ҳунарга йўналтириш ҳамда доимий даромад манбаига эга бўлишлари учун зарур тавсиялар берилди.

Қувонарлиси, ярмарка давомида ишлаш истагини билдирган 20 нафар ёш ўзлари қизиққан йўналишлар бўйича корхонага ишга жойлаштирилди. Ушбу амалий қадам маҳаллаларда ёшлар бандлигини таъминлаш, уларнинг ижтимоий мавқеини мустаҳкамлаш ва эртанги кунга бўлган ишончини оширишда муҳим аҳамият касб этади.