Navoiyda kitobxonlik va yoshlar bilan muloqotga bag‘ishlangan uchrashuv

Xalq deputatlari Navoiy shahar Kengashi huzuridagi Yoshlar maslahat guruhi a’zolari — Jalolova Lobarxon va Maqsudova Alina, shuningdek, Xalq deputatlari Navoiy shahar Kengashi deputati, Navoiy shahar hokimi Dilmurod Ergashev Abdulla Qodiriy nomidagi Axborot-kutubxona markaziga tashrif buyurdilar.

Tashrif davomida mehmonlar markaz faoliyati bilan yaqindan tanishib, bu yerda yaratilgan zamonaviy shart-sharoitlar, boy kitob fondi, elektron resurslar bazasi, shinam o‘quv zallari hamda yoshlar uchun tashkil etilgan qulay muhitni ko‘zdan kechirdilar. Shu bilan birga, kitobxonlik madaniyatini keng targ‘ib etish, yoshlarning bo‘sh vaqtini mazmunli tashkil etish va ularning bilim hamda salohiyatini oshirishga qaratilgan loyihalar yuzasidan atroflicha ma’lumotlar olindi.

Uchrashuv jarayonida yoshlar bilan samimiy muloqot tashkil etilib, ularning kitobxonlikka bo‘lgan qiziqishi, ta’lim jarayonidagi ehtiyojlari, taklif va tashabbuslari tinglandi. Yoshlar tomonidan bildirilgan fikrlar qo‘llab-quvvatlanib, ularni rag‘batlantirish hamda zamonaviy bilim olishlari uchun yanada keng imkoniyatlar yaratish masalalariga alohida e’tibor qaratildi.Mazkur tashrif yoshlar o‘rtasida kitobxonlik madaniyatini rivojlantirish, ularning intellektual salohiyatini yuksaltirish hamda ta’lim muassasalari faoliyatini yanada takomillashtirish yo‘lida muhim qadam bo‘lib xizmat qiladi.