Bugun Prezident Shavkat Mirziyoyev tashabbusi bilan “Yashil makon” umummilliy loyihasi doirasida keng ko‘lamli ko‘chat ekish tadbiri tashkil etildi.

Davlatimiz rahbari ta’kidlaganidek, xalqimiz azal-azaldan Navro‘z ayyomi kunlarida, oilasida quvonchli voqealar yuz berganida, tomorqa va xiyobonlarga, yo‘l chetlariga ezgu niyat bilan ko‘chat ekib kelgan. Ana shu ezgu qadriyatlar asosida so‘nggi besh yil davomida “Yashil makon” loyihasi izchil amalga oshirilib, har yili o‘rtacha 200 million tup ko‘chat ekib kelinmoqda.

O‘tgan davr mobaynida 2 ming gektardan ortiq hududda 942 ta yashil bog‘ va jamoat parklari, 47 ta massivda “Yangi O‘zbekiston bog‘lari” barpo etildi. Shuningdek, tog‘, cho‘l va adir hududlarida 256 ming gektar o‘rmonlar tashkil qilindi. Orol dengizining qurigan tubida esa 2 million gektar maydonda himoya o‘rmonzorlari barpo etilib, ekologik muhitni yaxshilashga xizmat qilmoqda.

Bundan tashqari, shamol hamda qum-chang bo‘ronlarining zararli ta’sirini kamaytirish maqsadida 33 ta tumanda umumiy uzunligi 60 kilometr bo‘lgan “yashil belbog‘”lar yaratildi.

Mazkur muhim ekologik tadbirda Xalq deputatlari Termiz tuman Kengashi deputatlari ham faol ishtirok etib, hududlarda ko‘chat ekish, atrof-muhitni muhofaza qilish va obodonlashtirish ishlariga munosib hissa qo‘shdilar.