Deputat va aholi muloqoti – ochiqlik va ishonchning muhim omili

Xalq deputatlari Navoiy shahar Kengashi deputati Eshniyozov Muhammad Agzamovich tomonidan Navoiy shahar Yangiobod mahalla fuqarolari bilan navbatdagi uchrashuv tashkil etildi.

Mazkur uchrashuvda deputat tomonidan joriy yilning 1-choragi davomida amalga oshirilgan ishlar yuzasidan batafsil axborot taqdim etildi. Xususan, aholi murojaatlarini o‘rganish, ijtimoiy muammolarni hal etish, mahalladagi infratuzilmani yaxshilash hamda fuqarolar farovonligini oshirishga qaratilgan qator ishlar amalga oshirilgani qayd etildi.

Uchrashuv davomida fuqarolar tomonidan yo‘llar holati, kommunal xizmatlar sifatini yaxshilash, ish bilan ta’minlash hamda yoshlar bandligini oshirish kabi masalalar ko‘tarildi. Deputat har bir murojaatni diqqat bilan tinglab, ularni hal etish bo‘yicha tegishli tashkilotlar bilan hamkorlikda aniq chora-tadbirlar ko‘rilishini ta’kidladi.

Shuningdek, mahallada amalga oshirilayotgan obodonlashtirish ishlari, aholi uchun qulay shart-sharoitlar yaratish borasidagi rejalar haqida ham ma’lumot berildi. Fuqarolar tomonidan bildirilgan taklif va mulohazalar kelgusidagi ish rejalarini belgilashda muhim ahamiyat kasb etishi alohida qayd etildi.

Bunday ochiq muloqotlar aholi bilan doimiy aloqani mustahkamlash, ularning dard-u tashvishlarini o‘z vaqtida hal etish hamda joylardagi ijtimoiy-iqtisodiy rivojlanishni ta’minlashda muhim o‘rin tutadi.

Uchrashuv yakunida fuqarolar deputat faoliyatiga ijobiy baho berib, bunday muloqotlarni muntazam ravishda o‘tkazib borish zarurligini ta’kidladilar.