Olmazor tumanida tibbiyot muassasalari faoliyati o‘rganilmoqda

Xalq deputatlari Olmazor tuman Kengashi deputatlari tomonidan hamda "Ahil" MFY raisi A. Xasanov ishtirokida sog‘liqni saqlash tizimidagi holatni o‘rganish maqsadida tumandagi bir qator tibbiyot muassasalarida o‘rganish ishlari olib borilmoqda.

Deputatlar tuman hududlarida joylashgan Oilaviy poliklinikalar va xususiy klinikalarga borib, u yerdagi xizmat ko‘rsatish tartibi, tibbiy jihozlar holati, xodimlarning ish sharoitlari hamda bemorlarga yaratilgan imkoniyatlar bilan tanishdilar. Jarayon davomida aholi bilan muloqotlar o‘tkazilib, fuqarolar fikr va takliflari tinglandi.

Dastlab deputatlar Oilaviy poliklinikalarda aholiga bepul dori-darmon vositalarini tarqatish jarayonini o‘rgandilar. Kengash raisi mavjud dastur doirasida surunkali kasalliklarga chalingan bemorlarga elektron retsept asosida dori vositalari bepul berilayotgani jarayonini kuzatdilar. Mazkur dastur aholining sog‘ligini muhofaza qilish, davolanish xarajatlarini kamaytirish va ijtimoiy himoyani kuchaytirishga qaratilgan muhim islohotlardan biridir.

Aniqlangan masalalar yuzasidan mutasaddi tashkilotlarga tegishli tavsiyalar berildi. Monitoringlar davomiy bo‘lib, kelgusida boshqa tumanlardagi tibbiyot muassasalari faoliyatini ham qamrab oladi.