Deputat ishlab chiqarish jarayonlari bilan tanishdi

Xalq deputatlari Paxtakor tuman Kengashi deputati Sarvar Ulug‘murodov tumandagi “Paxtakor Tekstil” korxonasi faoliyati bilan yaqindan tanishdi. 

Tashrif davomida korxonada yo‘lga qo‘yilgan ishlab chiqarish jarayonlari, zamonaviy texnologiyalar hamda ishchilarga yaratilgan shart-sharoitlar o‘rganildi.

Alohida e’tibor korxonada yaratilgan yangi ish o‘rinlariga qaratildi. Ta’kidlanishicha, “Paxtakor Tekstil” tumanda bandlikni ta’minlashda muhim o‘rin tutib, ayniqsa yoshlar va xotin-qizlar uchun doimiy ish o‘rinlari yaratishda salmoqli hissa qo‘shmoqda.

Tanishuv jarayonida ayrim yo‘nalishlarda ish samaradorligini yanada oshirish, ishlab chiqarishni kengaytirish hamda yangi ish o‘rinlari yaratish bo‘yicha taklif va tavsiyalar bildirildi.