Deputat L.Murotova tomonidan 12-Navbahor saylov okrugi hududidagi madaniyat muassasalari va kutubxonalar faoliyati o‘rganildi.

Xalq deputatlari Chilonzor tuman Kengashi deputati, 12-Navbahor saylov okrugi deputati Murotova Lola Ne’matjon qizi hududdagi madaniyat muassasalari va kutubxonalar faoliyati, ularning aholiga ko‘rsatayotgan xizmatlari hamda mavjud sharoitlarni o‘rganish maqsadida tumandagi Madaniyat uyi va Axborot-bilim markazi faoliyati bilan yaqindan tanishdi.

Tashrif davomida mazkur muassasalarda aholi, ayniqsa yoshlar va kitobxonlar uchun yaratilgan shart-sharoitlar, kitob fondi, ma’naviy-ma’rifiy tadbirlar tashkil etish jarayonlari hamda aholiga axborot xizmatlari ko‘rsatish holati o‘rganildi. 

Shuningdek, mutasaddilar bilan suhbat o‘tkazilib, muassasalar faoliyatini yanada takomillashtirish, kitobxonlik madaniyatini rivojlantirish va aholiga qulay sharoitlar yaratish masalalari yuzasidan fikr almashildi.

Deputat tomonidan madaniyat muassasalari va kutubxonalar aholining ma’naviy-ma’rifiy saviyasini oshirishda muhim ahamiyatga ega ekanligi ta’kidlanib, ular faoliyatini qo‘llab-quvvatlash va yanada rivojlantirish bo‘yicha tegishli taklif va tavsiyalar berildi.

Bu kabi o‘rganishlar aholi manfaatlarini ta’minlash, madaniyat va ma’rifat sohasini yanada rivojlantirish hamda jamoatchilik bilan yaqin muloqotni mustahkamlashga xizmat qiladi.