Xalq deputatlari Bag'dod tumani Kengashining yettinchi chaqiriq o‘n yettinchi sessiyasi bo'lib o'tdi.

Xalq deputatlari Bag'dod tumani Kengashining yettinchi chaqiriq o‘n yettinchi sessiyasi bo'lib o'tdi:

        Sessiyada deputatlar, tuman rahbarlari, tegishli idora va tashkilotlar mas’ullari hamda ommaviy axborot vositalari vakillari ishtirok etdi.

        Sessiya kun tartibidan o‘rin olgan masalalar yuzasidan tuman prokuraturasi va ichki ishlar bo‘limining 2025-yil davomida qonuniylikni ta’minlash, jinoyatchilikning oldini olish va unga qarshi kurashish borasida amalga oshirgan ishlari haqidagi hisobotlari eshitildi va qizg‘in muhokama qilindi.

        Shu kuni Xalq deputatlari Bag‘dod tumani Kengashining “Korrupsiyaga qarshi kurashish va xavfsizlik masalalari bo‘yicha” doimiy komissiyasi raisi tomonidan tahliliy ma’lumotlar o‘qib eshittirildi.

        Muhokamalar jarayonida tuman IIB boshlig‘i tomonidan oldini olish mumkin bo‘lgan jinoyatlar o‘tgan yilga nisbatan tahlil qilinib, ayrim holatlarda maktab yoshidagi o‘quvchilar, hatto ayollarning jinoyatlarga jalb etilayotgani afsuslanarli holat ekani ta’kidlandi.

        Tuman prokurori o‘z hisobotida korrupsiya va jinoyatchilikning oldini olish bo‘yicha qat’iy choralar ko‘rilayotganiga qaramay, ayrim tashkilotlarda fuqarolarning ishonchiga kirib, pul evaziga ish bitirish holatlari hanuz uchrayotgani keskin tanqid qilindi.

        Shuningdek, davlat organlarida norma ijodkorligi, huquqni qo‘llash amaliyoti hamda huquqiy targ‘ibot va ma’rifat ishlari holati muhokama etildi. Jamoatchilik fikri asosida shakllantirilgan tadbirlarni moliyalashtirishga yo‘naltirilgan mablag‘lar sarfi, “edu.ijro.uz” tizimi orqali nazoratga olingan topshiriqlarning ijro holati ham sessiya diqqat markazida bo‘ldi.

        Bundan tashqari, tashabbusli budjet jarayonlariga oid amaldagi nizomga hamda tuman Kengashi doimiy komissiyalari tarkibiga o‘zgartirishlar kiritish masalalari ko‘rib chiqildi. Mas’ul rahbarlarga deputatlar tomonidan savollar berilib, tegishli taklif va tavsiyalar bildirildi.

        Sessiya yakunida kun tartibidagi barcha masalalar yuzasidan tegishli qarorlar qabul qilindi. Mazkur sessiya tumanni ijtimoiy-iqtisodiy rivojlantirish hamda boshqaruv samaradorligini oshirishga qaratilgan muhim qarorlar bilan ahamiyatli bo‘ldi.

Xalq vakillari masʼullarga saylovchilar murojaatlari asosida aniq va qatʼiy savollar yoʼlladilar. Muhokamalar ochiq va shaffof ruhda kechdi. Shu bois, sessiya 1 soatdan ortiq davom etdi. U Bagʼdod tumani hokimligining Аxborot xizmati rasmiy telegram kanali orqali jonli efirda namoyish etildi. (https://t.me/bagdodim_news/56090).