“Kelajak soati” darsi o‘tkazildi

Toyloq tuman ixtisoslashgan maktabida 8-dekabr – O‘zbekiston Respublikasi Konstitutsiyasi qabul qilingan kun munosabati bilan 9–11-sinf o‘quvchilari uchun navbatdagi “Kelajak soati” mashg‘uloti o‘tkazildi. Mazkur darsning asosiy maqsadi o‘quvchilarda inson huquqlari va erkinliklari, shaxsiy hayot daxlsizligi hamda ularning jamiyat taraqqiyotidagi o‘rni borasida chuqur tushuncha va ko‘nikmalarni shakllantirishdan iborat bo‘ldi.

Dars mashg‘ulotini Toyloq tumani hokimi Behzod Raxmatullayev olib bordi. U o‘quvchilar bilan samimiy va ochiq muloqotda bo‘lib, jamiyat taraqqiyotida huquqiy ong va madaniyatning tutgan o‘rni haqida batafsil tushuntirib berdi.

Tuman hokimi yoshlarning fikrlarini tinglab, ularni faollikka, mustaqil fikrlashga, o‘z huquqlarini bilish va ulardan to‘g‘ri foydalanishga chorlab, mamlakat kelajagi aynan bilimli, tashabbuskor va huquqiy madaniyatga ega yoshlar qo‘lida ekanini ta’kidladi.