Ko‘kdala tumanida “Maromiylik loyihasi” doirasida targ‘ibot tadbirlari o‘tkazildi

Ko‘kdala tumanida “Maromiylik loyihasi” doirasida targ‘ibot tadbirlari o‘tkazildi

Ko‘kdala tumani hokimligida tuman hokimi X.Djurayev va tuman prokurori B.Bekbutayev boshchiligida “To‘ylar, oilaviy tantanalar, ma’raka va marosimlar o‘tkazilishini tartibga solish tizimini yanada takomillashtirishda davlat va jamoat tashkilotlarining roli” mavzusida “Maromiylik loyihasi” yuzasidan targ‘ibot tadbiri o‘tkazildi.

Tadbirda mutasaddi tashkilotlar vakillari, tuman deputatlari, imom-xatiblar, nuroniylar, mahalla raislari, xotin-qizlar faollari, jamoatchilik vakillari hamda yoshlar ishtirok etishdi.

Uchrashuv davomida isrofgarchilikning oldini olish, oqilona iste’mol madaniyatini shakllantirish, ortiqcha dabdabalarni kamaytirish masalalari muhokama qilindi. Shuningdek, mahallalarda to‘y va marosimlarni ixchamlashtirish bo‘yicha aholining fikri inobatga olingan holda ishlab chiqilgan tartiblar yuzasidan tushuntirishlar berildi.

Tadbirda so‘zga chiqqan nuroniylar va jamoatchilik vakillari “Maromiylik loyihasi”ni aholiga keng targ‘ib etish, bu borada hamkorlikni kuchaytirish zarurligini ta’kidlashdi.

Shuningdek, uchrashuvda erta nikoh va noqonuniy sha’riy nikoh holatlarining oldini olish, fuqarolarga huquqiy tushunchalar berish masalalari ham atroflicha muhokama qilindi.