⚡️⚡️ “Deputat va yoshlar”- muloqot va hamkorlik sari.

Buxoro davlat pedagogika institutida joriy yilning iyun — Yoshlar oyligi munosabati bilan O‘zbekiston Respublikasi Oliy Majlisi Senati huzuridagi Yoshlar parlamenti a’zolari, uning faol yoshlar jamoasi hamda mahalliy Kengashlar qoshida tashkil etilgan yoshlar maslahat guruhlari vakillari ishtirokida sermazmun uchrashuv bo‘lib o‘tdi. Uchrashuv davomida mamlakatimizda yosh avlodga yaratilayotgan keng imkoniyatlar, ularning bilim olishi, kasb egallashi va jamiyatda o‘z o‘rnini topishi uchun yaratilgan shart-sharoitlar xususida atroflicha ma’lumot berildi.

Shuningdek, korrupsiyaga qarshi kurashish, bu illatning oldini olish bo‘yicha olib borilayotgan ishlar, yoshlarning huquqiy savodxonligini oshirish masalalari ham muhokama qilindi. Ta’kidlandiki, yoshlar korrupsiyaga murosasiz munosabatda bo‘lishi, halollik va adolat tamoyillariga sodiq qolishi, jamiyatda korrupsiyaga qarshi kurashishda faol ishtirok etishi lozim.

Bundan tashqari, yoshlar joylardagi aholining dolzarb muammolarini o‘rganish va ularni hal etishda deputatlar bilan hamkorlik aloqalarini mustahkamlashi, shuningdek, hududlardagi yoshlarning tizimli muammolarini bartaraf etish yuzasidan Oliy Majlis Senatiga asosli takliflar kiritib borishi lozimligi ta’kidlandi. Uchrashuv so‘ngida ushbu masalalar yuzasidan faol fikr almashildi.