Tashrif davomida savdo va xizmat ko‘rsatish shoxobchalarida aholiga yaratilgan qulayliklar, mahsulotlar sifati va narxlari, sanitariya talablariga rioya etilishi, iste’molchilarga ko‘rsatilayotgan xizmatlar sifati hamda tadbirkorlik subyektlari faoliyati atroflicha o‘rganildi.

Shuningdek, “Asiya Alliance Bank” filialida tadbirkorlar va fuqarolarga ko‘rsatilayotgan bank xizmatlari, kredit va moliyaviy qo‘llab-quvvatlash dasturlari, zamonaviy bank xizmatlaridan foydalanish imkoniyatlari hamda mijozlarga xizmat ko‘rsatish sifati yuzasidan mutasaddilar bilan fikr almashildi.

O‘rganishlar davomida tadbirkorlar va mas’ul xodimlarning taklif hamda murojaatlari tinglanib, faoliyat davomida uchrayotgan ayrim muammolar yuzasidan amaliy tavsiyalar berildi. Bildirilgan masalalarni tegishli tashkilotlar bilan hamkorlikda hal etish bo‘yicha zarur choralar belgilandi.

Deputat tomonidan hududda savdo, xizmat ko‘rsatish va bank xizmatlari sifatini yanada oshirish, tadbirkorlikni qo‘llab-quvvatlash hamda aholiga ko‘rsatilayotgan xizmatlar samaradorligini ta’minlash masalalariga alohida e’tibor qaratildi.

Xalq deputatlari Samarqand shahar Kengashi deputatlari tomonidan hududlarda faoliyat yuritayotgan tadbirkorlik subyektlari va xizmat ko‘rsatish tashkilotlari faoliyatini o‘rganish, mavjud muammolarni joyida hal etish hamda aholiga sifatli xizmat ko‘rsatishni ta’minlash borasidagi ishlar izchil davom ettirilmoqda.