Xalq deputatlari Jondor tumani Kengashiga 3-Romish saylov okrugidan saylangan deputat R.Bozorova hamda tuman Kengashi kotibiyati bosh mutaxassisi R.Murodovlar hamkorlikda Romish mahallasida bo‘lib, mahalla xotin-qizlar faoli M.Homidovaning faoliyatini o‘rgandilar.

✔️O‘rganish jarayonida mahallada xotin-qizlar bilan ishlash tizimi, ularning ijtimoiy-siyosiy hayotdagi ishtiroki, bandligini ta’minlash va muammolarini hal etish bo‘yicha amalga oshirilayotgan ishlar tahlil qilindi. Xususan, xotin-qizlarning jamiyatdagi faolligini oshirish, ularni qo‘llab-quvvatlash hamda ijtimoiy himoyasini kuchaytirishga qaratilgan chora-tadbirlar muhokama qilindi.

✔️Shuningdek, tadbir doirasida xotin-qizlarning siyosiy faolligini oshirish, ularni kasb-hunarga o‘qitish, oilaviy tadbirkorlikka keng jalb qilish, doimiy daromad manbai yaratish orqali bandligini ta’minlash masalalariga alohida e’tibor qaratildi. Oliy ta’lim olish istagida bo‘lgan qizlar uchun mavjud imtiyozlar, qabul jarayonlari va yaratilgan imkoniyatlar yuzasidan tushuntirish ishlari olib borildi.

✔️Uchrashuv davomida ishtirokchilarga davlatimiz tomonidan xotin-qizlarni qo‘llab-quvvatlash borasida qabul qilingan qaror va dasturlar mazmun-mohiyati yetkazildi. Shu bilan birga, mahalladagi xotin-qizlarning muammolari, taklif va tashabbuslari tinglanib, ularni hal etish bo‘yicha tegishli choralar ko‘rish yuzasidan vazifalar belgilab olindi.

✔️Mazkur tashrif va o‘tkazilgan targ‘ibot-tashviqot tadbirlari Romish mahallasida xotin-qizlarning ijtimoiy-siyosiy faolligini yanada oshirish, ularni qo‘llab-quvvatlash va jamiyatdagi o‘rnini mustahkamlashga xizmat qiladi.