Ma’lumki, mamlakatimizda mahallalar darajasida aholi muammolarini o‘z vaqtida aniqlash va samarali yechimini topish, ijtimoiy himoya tizimining manzilliligi va shaffofligini ta’minlash orqali fuqarolar yashash sharoitlarini yanada yaxshilash bo‘yicha keng qamrovli ishlar amalga oshirilmoqda. 

Mahallaning jamiyat hayotidagi o‘rnini oshirish hamda sohada boshqaruv tizimini takomillashtirish maqsadida mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim va soliq inspektoridan iborat “Mahalla yettiligi” tashkil qilindi. 

Mazkur sohada belgilangan vazifalarni samarali amalga oshirishda “Mahalla yettiligi”ga ko‘maklashish, mahallalarda qabul qilinayotgan qarorlarning haqqoniyligi va asosliligini ta’minlash maqsadida xalq deputatlari mahalliy Kengashlari deputatlari va “Mahalla yettiligi”ning o‘zaro hamkorligini yo‘lga qo‘yish dolzarb ahamiyat kasb etmoqda.

O‘zbekiston Respublikasi Oliy Majlisi Senati Kengashining 2024-yil 4-apreldagi “Mahallalardagi muammolarni hal etishda Xalq deputatlari mahalliy Kengashlari deputatlari va senatorlarning “Mahalla yettiligi” bilan o‘zaro hamkorligini yo‘lga qo‘yish chora-tadbirlari to‘g‘risida”gi KQ-706-IV-sonli qarori ijrosini ta’minlash maqsadida, Xalq deputatlari Chinoz tumani Kengashi deputatlari tomonidan o‘z okruglaridagi mahallalarda o‘rganish ishlari olib borilib, “mahalla yettiligi” bilan fuqarolar qabullari tashkil etilmoqda.

Jumladan, tuman Kengashi deputati Nigora Muxamadiyeva tomonidan Amir Temur mahallasida mahalla yettiligi va tegishli mutasaddi idora va tashkilotlar rahbarlarini jalb qilgan holda sayyor qabul o‘tkazildi.

Fuqarolar qabulida ko‘tarigan masalalar ro‘yxati shakllantirilib, atroflicha o‘rganib chiqildi. O‘rganish jarayonida aholi murojaatlarining aksariyati shu yerning o‘zida ijobiy hal etildi.

Shuningdek, tuman Kengashi deputatlari o‘zlari biriktirilgan mahallalarda chet elda mehnat faoliyatini amalga oshirish istagidagi fuqarolarga qulay sharoit yaratish hamda mehnat migratsiyasidan qaytgan shaxslarni reintegratsiya qilish ishlarining holati o‘rganilib, nazorat qilinmoqda, bu borada “Mahalla yettiligi” bilan muloqotlar o‘tkazilmoqda.

O‘rganish va aholi bilan muloqot natijalari bo‘yicha aniqlangan muammolar va shakllantirilgan takliflar “mahalla yettiligi” bilan umumlashtirilib, tegishli doimiy komissiyalarda ko‘rib chiqish uchun Xalq deputatlari tuman Kengashi kotibiyatiga taqdim etib borish belgilab olindi.