Harbiy xizmatga jo‘nab ketishi rejalashtirilgan yoshlar hamda ularning ota-onalari ishtirokida uchrashuv yig‘ilishi bo‘lib o‘tdi. Tadbir davomida Xalq deputatlari Chinoz tumani Kengashi deputati M.Mirsodiqov, mas’ul rahbarlar va mutasaddi tashkilot vakillari tomonidan armiyaga chaqirilayotgan yigitlarning harbiy xizmatni o‘tash tartibi, yaratilayotgan sharoitlar, ularning huquq va majburiyatlari yuzasidan batafsil tushuntirishlar berildi.

Shuningdek, ota-onalarni qiziqtirgan savollarga javoblar berilib, farzandlarning sog‘lig‘i, xavfsizligi va harbiy xizmat davomida davlat tomonidan ko‘rsatiladigan ijtimoiy kafolatlar haqida ma’lumotlar yetkazildi. Uchrashuv ochiq muloqot tarzida o‘tkazilib, ishtirokchilar o‘z fikr-mulohaza va takliflarini bildirish imkoniga ega bo‘ldilar.

Mazkur yig‘ilish yoshlarni harbiy-vatanparvarlik ruhida tarbiyalash, ota-onalarning ishonchini mustahkamlash hamda harbiy xizmatga tayyorgarlik jarayonini samarali tashkil etishga xizmat qildi.