Mahalla hududida qonunchilik hujjatlari ijrosi ustidan jamoatchilik nazoratini o‘rnatish, xususan, ta’lim, tibbiy xizmat, sport, savdo va xizmat ko‘rsatish sohalarida belgilangan qoidalarga rioya etilishini ta’minlash yuzasidan o‘rganishlar izchil davom ettirilmoqda.

Jumladan, tuman deputati Asqarali Odilov tomonidan ta’lim muassasalarida o‘rganish ishlari olib borilib, o‘quv jarayonining tashkil etilishi, mavjud shart-sharoitlar hamda belgilangan talablarning bajarilishi holati atroflicha ko‘zdan kechirildi. Shu bilan birga, ta’lim muassasalaridagi tibbiyot xonalarining jihozlanganlik darajasi, dori-darmon vositalarining sifati va saqlanish holati, shuningdek, o‘quvchilar salomatligini muhofaza qilish bo‘yicha olib borilayotgan ishlar ham alohida o‘rganildi.

Bundan tashqari, yoshlarning sport bilan muntazam shug‘ullanishi uchun yaratilgan shart-sharoitlar, sport inshootlarining holati hamda ularning samarali foydalanilishi yuzasidan ham atroflicha tahlillar o‘tkazildi.

O‘rganish yakunlari bo‘yicha aniqlangan kamchiliklar yuzasidan mas’ullarga tegishli tavsiyalar berilib, ularni bartaraf etish hamda ta’lim sifati va xizmatlar samaradorligini yanada oshirish bo‘yicha zarur chora-tadbirlar belgilab olindi.