Xalq deputatlari Ishtixon tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasining navbatdagi yig‘ilishi bo‘lib o‘tdi.

 Yig‘ilishda muhim masala — O‘zbekiston Respublikasi Prezidentining 2025-yil 26-dekabrdagi “Mahalliy budjetlar va budjet tashkilotlarining moliyaviy barqarorligini oshirish, budjet intizomini kuchaytirishga doir qo‘shimcha chora-tadbirlar to‘g‘risida”gi PQ–387-son Qarorining ijrosi yuzasidan masala ko‘rib chiqildi.

Mazkur qarorga muvofiq, 2026-yil 1-yanvardan boshlab Obodonlashtirish boshqarmalari tomonidan tuman (shahar)lar markaziy ko‘chalari bo‘yida faoliyat yuritayotgan tadbirkorlik subyektlariga shartnoma asosida chiqindilarni olib chiqish hamda hududlarni obodonlashtirish xizmatlarini ko‘rsatishga ruxsat berilishi belgilangan.

Shuningdek, qarorning tegishli bandlariga asosan, ushbu xizmatlar uchun to‘lov tariflari tuman (shahar) hokimliklari tomonidan ishlab chiqilib, Xalq deputatlari Kengashlariga ko‘rib chiqish va tasdiqlash uchun kiritilishi lozimligi qayd etilgan.

Yig‘ilish davomida Ishtixon tumani Obodonlashtirish boshqarmasi tomonidan ko‘rsatiladigan obodonlashtirish va maishiy chiqindilarni olib chiqish xizmatlari uchun to‘lov tariflari miqdorini tasdiqlash masalasi muhokama qilindi.

Shunga muvofiq, taqdim etilgan takliflarga ko‘ra quyidagi tariflar muhokama qilindi:

🔹 Maishiy chiqindilarni olib chiqish — 1 m³ uchun 100 800 so‘m

 🔹 Maishiy chiqindilarni olib chiqish — 1 tonna uchun 215 000 so‘m

 🔹 Suyuq chiqindilarni olib chiqish — 1 tonna uchun 97 400 so‘m

 🔹 Hududlarni obodonlashtirish xizmati — 1 kv.m uchun 5 200 so‘m

Komissiya a’zolari tomonidan mazkur tariflarni asoslangan holda shakllantirish, aholiga va tadbirkorlik subyektlariga qo‘shimcha yuklamalar tushmasligini ta’minlash, xizmatlar sifati va shaffofligini oshirish yuzasidan tegishli tavsiyalar berildi.

Shu bilan birga, mazkur masalani Xalq deputatlari Ishtixon tumani Kengashining navbatdagi sessiyasi kun tartibiga kiritish yuzasidan takliflar ilgari surildi.