Ma’lumki, yurtimizda hududlarni ijtimoiy-iqtisodiy rivojlantirish hamda aholi turmush darajasini oshirishga qaratilgan davlat va mahalliy dasturlar, shuningdek, investitsiya loyihalari hayotga tatbiq etib kelinmoqda. Natijada olis-olis manzillarimiz obod bo‘lyapti, odamlar islohotlar samarasini o‘zlarining kundan kunga yaxshilanib borayotgan turmushlari misolida ko‘rib, bilib turibdi.

Dasturlar ijrosi, aholi turmush farovonligi uchun muammolar yechimiga takliflar bildirish, murojaatlarni tinglash — bularning barchasi mahalliy Kengashlar zimmasidagi mas’uliyat sanaladi. Shu ma’noda, Xalq demokratik partiyasi yangi saylangan deputatlarning bilim va ko‘nikmalarini boyitish, faoliyat samaradorligini ta’minlashga qaratilgan seminarlar tashkil qilmoqda.

Samarqandda bo‘lib o‘tgan o‘quvda viloyat, tuman va shahar Kengashlari deputatlari, partiya faollari hamda mutaxassislar ishtirok etdi. Seminarda ta’kidlandiki, mahalliy Kengashlar deputatlari o‘zlarining hududida qanday dasturlar hayotga tatbiq etilayotgani, ular qanday samara berayotgani, ijrosi kabi masalalarda hamisha ogoh bo‘lishi kerak. Muammolardan ham bevosita xabardor bo‘lishi talab etiladi.

Shunday ekan, bu o‘rinda mahalliy Kengashlar deputatlari kuchidan foydalanish eng to‘g‘ri va samarali yo‘ldir. Joylarda amalga oshirilayotgan davlat dasturlari ijrosi nazorati bo‘yicha ham shu tajribani qo‘llash esa samaradorlikni oshirishga xizmat qiladi.

Partiya Markaziy Kengashi raisi o‘rinbosari Maqsuda Vorisova boshchiligidagi ishchi guruh trening ishtirokchilariga shu va boshqa masalalarda tushuntirishlar berdi. Partiya tomonidan tayyorlangan qo‘llanmalar tarqatildi.