Янгиқўрғон туман Ахборот-кутубхона марказида ҳамда Халқ депутатлари Янгиқўрғон туман Кенгаши депутати Юлдашев Турсунпўлат Ҳакимбекович иштирокида 1-сонли мактаб билан ҳамкорликда Ўзбекистон Республикаси Президентининг 2026 йил 15 январдаги “Китобхонлик маданиятини ривожлантириш ва аҳоли ўртасида китоб ўқишга қизиқишни ошириш чора-тадбирлари тўғрисида”ги ПҚ-9-сон қарори ижросини таъминлаш мақсадида “Китобсевар миллат” шиори остида VI Республика “Китобхонлик ҳафталиги”нинг очилиш маросими бўлиб ўтди.

Мазкур тадбирни ўтказишдан кўзланган асосий мақсад аҳоли, айниқса ёшлар ўртасида китобхонлик маданиятини юксалтириш, уларнинг маънавий-ахлоқий дунёқарашини бойитиш ҳамда китобга бўлган қизиқишини янада оширишдан иборатдир.

Очилиш маросимида жарчи томонидан “Китобхонлик ҳафталиги” доирасида ўтказиладиган тадбирларга барча фуқаролар кенг жалб этилишига чақириқ қилинди. Шунингдек, мактаб ўқувчилари томонидан тайёрланган куй-қўшиқлар ва бадиий чиқишлар тадбирга кўтаринки руҳ бағишлади.

Тадбир давомида Янгиқўрғон туман Ахборот-кутубхона маркази томонидан турли мавзулардаги китоблардан иборат кўргазма ташкил этилди. Кўргазмада янги нашрлар, бадиий адабиётлар ҳамда ёшлар тарбиясига хизмат қилувчи асарлар кенг намойиш этилди ва иштирокчиларда катта қизиқиш уйғотди.

Шунингдек, тадбир иштирокчилари томонидан китобхонликни тарғиб қилиш, ёшларни бўш вақтларини мазмунли ташкил этиш, уларни мутолаага жалб этиш юзасидан фикр-мулоҳазалар билдирилди.

Мазкур “Китобхонлик ҳафталиги” доирасида туман ҳудудида турли маънавий-маърифий тадбирлар, учрашувлар, танловлар ва китоб ярмаркаларини ташкил этиш режалаштирилган.