#Sessiya_oldi_organish #19_1_Modda_ijrosi

❗️ YASHNOBOD TUMANIDAGI “TASHISTI” MAHALLASIDA ELEKTR, GAZ VA KO‘CHA YORITISH TIZIMLARI HOLATI O‘RGANILDI

🏛 Toshkent shahar hokimi o‘rinbosari O. Muminov hamda Xalq deputatlari Toshkent shahar Kengashi deputatlari Davronbek Ravshanbekov va Sevara Fayziyeva birgalikda Yashnobod tumanidagi “Tashisti” mahalla fuqarolar yig‘ini hududiga tashrif buyurib, kommunal infratuzilma holati, elektr va gaz ta’minoti, ko‘cha yoritish tizimlari hamda aholining mavjud muammolarini joyiga chiqqan holda o‘rgandilar.

🔎 O‘rganish davomida mahallaning Tuzel-1 ko‘chasida elektr ta’minotini yaxshilash maqsadida SIP kabellarini tortish va beton elektr ustunlarini o‘rnatish, shuningdek, Abay bo‘sh ko‘chasida elektr energiyasi ta’minotini barqarorlashtirish uchun yangi transformator punktini o‘rnatish masalalari ko‘rib chiqildi. Mazkur hududlarda elektr tarmoqlarining mavjud holati, texnik imkoniyatlar hamda zarur infratuzilmani rivojlantirish bo‘yicha amalga oshirilishi lozim bo‘lgan ishlar muhokama qilindi.

🔺 Shuningdek, Tuzel-1 ko‘chasi boshida joylashgan GTP14-4-456-sonli gaz taqsimlash punktining ichki jihozlari bo‘yalmaganligi va xatlov kitobi to‘ldirilmaganligi aniqlanib, ushbu kamchiliklarni bartaraf etish, gaz taqsimlash punktini belgilangan texnik talablarga muvofiq tartibga keltirish yuzasidan mas’ullarga vazifalar belgilandi.

💡 Mahallaning Arg‘in ko‘chasida ko‘cha yoritish chiroqlari mavjud bo‘lmagan hududlar ham o‘rganilib, mahalla raisi bilan hamkorlikda tegishli xatlov ishlarini tashkil etish hamda zarur joylarga quyosh panellari asosida ishlovchi yoritish uskunalarini o‘rnatish masalasi muhokama qilindi. Shu bilan birga, mahalladagi xonadonlarning suv tarmoqlaridan foydalanish holatini vakolatli tashkilotlar tomonidan o‘rganish zarurligi qayd etildi.

📋 Aniqlangan kamchiliklar yuzasidan Yashnobod tuman elektr tarmoqlari, gaz ta’minoti hamda ko‘cha yoritish tizimiga mas’ul tashkilotlar rahbarlariga aniq topshiriqlar berilib, elektr tarmoqlarini tartibga keltirish, yangi transformator punktini o‘rnatish masalasini hal etish, gaz taqsimlash punktidagi kamchiliklarni bartaraf etish va yoritilmagan hududlarda zarur choralarni ko‘rish vazifalari yuklatildi.

⚖️ Belgilangan vazifalarning o‘z vaqtida va sifatli bajarilishi hamda ularning ijrosi yuzasidan tegishli ma’lumotlarni taqdim etish mas’ul ijrochilar zimmasiga yuklatildi.

📱 Telegram 📱 Instagram 📱 Facebook 📱 YouTube 🔎 E-kengash