Xalq deputatlari Zarbdor tumani Kengashining 2026-yil 30-apreldagi qarori bilan hududdagi ko‘p yillik muammoga amaliy yechim topildi. 13-Sharq yulduzi saylov okrugi deputati M.Isroilova o‘z saylovchilari bilan muloqot davomida "Sharq yulduzi" mahallasidagi Tinchlik va A.Qahhor ko‘chalarida oqova suv tizimi yo‘qligi sababli aholi xonadonlarida sanitariya sharoitlarini yaxshilash imkonsiz ekanligini aniqlagan edi.

Deputat tomonidan yuborilgan so‘rov va takliflar tuman Kengashi sessiyasida atroflicha ko‘rib chiqildi. Natijada, markazlashgan kanalizatsiya tizimini qurish uzoq vaqt va katta mablag‘ talab etishi inobatga olinib, deputat taklifiga ko‘ra dastur parametrlariga o‘zgartirish kiritildi.

Qabul qilingan qarorning asosiy natijalari:

- Dasturda rejalashtirilgan pillaxona binosi qurilishi bekor qilindi.

- Ushbu loyiha o‘rniga, aholi xonadonlaridagi oqova suv muammosini hal etish va qulaylik yaratish maqsadida og‘ir hududlarda zamonaviy umumiy xojatxonalar quriladigan bo‘ldi.