Mámleketimiz basshısı Shavkat Mirziyoev usı jıldıń 24-sentyabr kúni BMSh Bas Assambleyasında shıǵıp sóylegen sózinde Ózbekstannıń ishki hám sırtqı siyasatındaǵı eń áhmiyetli tiykarǵı baǵdarlardı ashıq-aydın hám tiykarlanǵan túrde usındı. Onıń shıǵıp sóylegen sózinde insan huqıqları, bilimlendiriw, densawlıqtı saqlaw hám ekonomikalıq rawajlanıw tarawlarında ámelge asırılıp atırǵan reformalar keń kólemde sáwlelendirildi. 

Prezident óziniń shıǵıp sóylegen sózinde demokratiyalıq reformalardıń toqtap qalmawı, erkin puqaralıq jámiyetin rawajlandırıw hám sud-huqıq sistemasın reformalaw sıyaqlı máselelerge úlken itibar qarattı. Bul bolsa dúnya jámiyetshiligine Ózbekstanda ámeliy ózgerisler bolıp atırǵanınıń ayqın dálili boldı. Sonıń menen birge, ol Oraylıq Aziya mámleketleri arasındaǵı jaqsı qońsıshılıq hám ekonomikalıq integraciya máselelerin de kóterip shıqtı. 

Ásirese, Awǵanstandaǵı jaǵday hám onıń regiondaǵı tásirlerine baylanıslı pikir-usınıslar xalıqaralıq ekspertler hám delegatlar tárepinen qızǵın dodalandı. Prezidenttiń bul temaǵa sergeklik penen qatnas jasawı, onıń tınıshlıqtı súyiwshi poziciyasın tastıyıqladı. Ol shıǵıp sóylegen sózinde xalıqaralıq jámiyetshilikti tınısh hám turaqlı Awǵanstan ushın birgelikte háreket etiwge shaqırdı. 

Xalıq deputatları Bozataw rayonlıq Keńesi deputatı A.Ibragimov