Muzrabot tumanida aholiga qulay va xavfsiz harakatlanish sharoitlarini yaratish, mahallalar ichki yo‘llarini ta’mirlash va obodonlashtirish borasida tizimli ishlar amalga oshirilmoqda.

Jumladan, O‘zbekiston Respublikasi Vazirlar Mahkamasining 2024 yil 11 oktyabrdagi 665-son qarori asosida tasdiqlangan manzilli dastur doirasida tumandagi 14 ta mahallada 31 ta ko‘cha, jami 20 kilometr ichki yo‘lni toshlash va asfaltlash uchun 4,4 milliard so‘m mablag‘ ajratilgan.

Mazkur ishlar ijrosi yuzasidan xalq deputatlari Muzrabot tumani Kengashi kotibiyati mudiri, 12-“Obodon” saylov okrugidan saylangan deputat D.N. Sherboyev tuman obodonlashtirish boshqarmasida bo‘lib, manzilli dastur doirasida amalga oshirilayotgan ishlar holatini o‘rgandi.

O‘rganish davomida ajratilgan mablag‘larning o‘zlashtirilishi va belgilangan vazifalar ijrosi tahlil qilinib, joriy yilda 3,842 milliard so‘mlik ishlar bajarilgani hamda 12,7 kilometr ichki yo‘l asfaltlangani ma’lum bo‘ldi.
Deputatlik nazorati natijasida ayrim mahallalarda ishlar to‘liq yakunlangani, qolgan hududlarda esa qurilish-ta’mirlash ishlari davom etayotganiga e’tibor qaratildi.

O‘rganish yakunida mas’ullarga qolgan ishlarni belgilangan muddatlarda, sifat talablariga qat’iy rioya qilgan holda yakunlash, ajratilgan mablag‘lardan samarali foydalanish hamda aholi uchun qulay va xavfsiz yo‘l infratuzilmasini ta’minlash yuzasidan tegishli tavsiyalar berildi.