Aholi murojaatlarini shunchaki eshitish emas, balki muammo o‘chog‘iga bevosita borib, real holatni ko‘zdan kechirish hamda unga manzilli yechim topish — deputatlik nazoratining bosh mezonidir.

“Saxovat” mahallasida o‘tkazilgan tahliliy yig‘ilish yakunlangandan so‘ng, Xalq deputatlari Termiz shahar Kengashi raisi, deputat D.Normuradova, 12-“Saxovat” saylov okrugi deputati X.Jurayev hamda kotibiyati bosh mutaxassisi R.Mamashukurovlar ushbu mahallada bo‘lib, navbatdagi nazorat-tahlil va o‘rganish tadbirini o‘tkazdilar.

Mazkur amaliy jarayon mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari doirasida tashkil etilib, asosiy e’tibor mahalladagi Uchqun ko‘chasiga qaratildi.

O‘rganish davomida quyidagi jiddiy muammo va kamchiliklar aniqlandi:

Eskirgan elektr ustunlari: Ko‘chadagi elektr simyog‘ochlari va ustunlari ma’nan va jismonan eskirgani, o‘z xizmat muddatini to‘liq o‘tab bo‘lgani kuzatildi;

Qurilish chiqindilari: Ko‘cha yo‘l yoqalarida va chetlarida qurilish chiqindilarining to‘planib qolganligi aniqlandi;

Tashlandiq binolardagi antisanitariya: Hududdagi e’tiborsiz va tashlandiq binolarga ayrim fuqarolar tomonidan maishiy chiqindilar tashlab ketilgan holatlar qayd etildi.

Uchqun ko‘chasida aniqlangan barcha salbiy holatlar va infratuzilma muammolari okrug deputati X.Jurayevning “Murojaat daftari”ga rasmiylashtirildi.

Ushbu kamchiliklarni bartaraf etish — ya’ni eskirgan elektr ustunlarini yangilash, qurilish chiqindilaridan ko‘chani tozalash hamda tashlandiq binolar atrofida sanitariya barqarorligini tiklash yuzasidan Elektr tarmoqlari korxonasi, Obodonlashtirish boshqarmasi va Ekologiya bo‘limiga rasmiy deputatlik so‘rovlari yuborilishi hamda ijrosi qat’iy nazoratga olinishi belgilandi.