Xalıq deputatları Bozataw rayonlıq Keńesi 12-sanlı "Aspantay" okruginen saylanǵan deputat Jumanazarova Gulperiza Genjebaevna tárepinen puqaralardıń múrájatları hám aymaqta alıp barılǵan úyreniwler tiykarında "Aspantay" APJ aymaǵındaǵı suw menen támiyinlew máselesi úyrenildi.
Úyreniwler nátiyjesinde "Aspantay" awıl puqaralar jıyını aymaǵındaǵı oraylıq kóshelerge suw jetispewshiligi bar ekenligi anıqlandı. Bul jaǵday, ásirese, puqaralardıń sharwa malların hám diyqan xojalıqlarındaǵı eginlerdi suwǵarıwda qıyınshılıqlar tuwdırmaqta.
Másele boyinsha ámeliy qádem
Anıqlanǵan máselelerdi esapqa alǵan halda, deputat tárepinen Bozataw rayonı suw jetkerip beriw xızmeti Mámleketlik mákemesi baslıǵı I. Artıqbaevqa deputatlıq soraw jiberildi.
Deputattıń sorawında "Ámiwdárya" dáryasındaǵı suw nasosın belgilengen grafik tiykarında yamasa puqaralardıń suwǵa bolǵan mútájligi tolıq támiyinlengenge shekem iske túsiriw, sonday-aq, "Aspantay" awıl puqaralar jıyını aymaǵına suw jetkerip beriw ilajların kóriw soralǵan.
Deputat sorawı - baqlaw hám juwapkershilik
Sorawda "Xalıq deputatları wálayat, rayon hám qala Keńesi deputatınıń statusı haqqında"ǵı Nızamnıń 5 hám 8-statyalarına muwapıq, 10 kún múddet ishinde tiykarlanǵan maǵlıwmat usınıw talap etilgen.
Bul jumıs puqaralardıń múrájatların esapqa alıw, olardıń turmıs sharayatın jaqsılaw hám aymaqtaǵı áhmietli máselelerdi tiyisli mákemeler aldında kóteriw boyınsha deputatlardıń ámeliy jumıslarınıń biri bolıp tabıladı.